حتى شمعاتك يجــاسم چنهه تعلم بالمصيبه
تنطفي وتذوب يبني طارك أسمك من أجيبه
والشمع يعلم يجاسم
ما اظن تسلم يجاسم
ــــــــــــــــــــــــــــ
انه رمله وما أصدك = بــــــاجر يزفــــونه جاسم
شلون أعبر عن فرحتي = كلبي من هالفرحه هايم
هذا الأكبر جــــاب شمعه = والعلكهه كـمر هاشم
ليش أخاف وكل عمامه = واكفه أتهز بالصوارم
هيه شمعاتك شفتهه وي دمعهه ســـــال دمعي
تنطفي واعلكهه يبني وتنطفي وختلف وضعي
والحزن خـيم يجاسم
ما اظن تسلم يجاسم
ـــــــــــــــــــــــــــ
عيني دارت للمدينـه = وصحت ريت الحسن حاظر
هالشمع حيرني وضعه = شراح اشوفن مدري باجر
وصـوت لن يظهر يكلي = مني هيــــــج هالمشاعر
فرحي يــارمله بزفـافه = عرس جـاسم يوم عاشر
وي شمعاتك اســـــولف مدري وحدي الليله أحچي
ومن اكول افرح ابعرسك ليش اشوفه الشمع يبچي
وكلبي يتــألم يجاسم
ما اظن تسلم يجاسم
ـــــــــــــــــــــــــــــــــــ
باجـــر يكولون عرسك = وانه ماأصـدك اعيوني
وللصبح سهرانه عيني = وسارحه بعالم اظنوني
هالألوف ألاجت تزحـــــــف = بيك يبني يهنوني
لو أجت تاخذ فرحتي = وبيك باجــــر يعزوني
فرح باجر لومصيبه يبني مدري وتاه فكري
وزفتك يوليدي وين ماتجـاوب وانته تدري
أركنت للــهم يجاسم
ما اظن تسلم يجاسم
ــــــــــــــــــــــــــــــــــــــ
حنتك بيدي اعجنتهه= والصــواني هالجبتهه
وبورد وشموع يبني = لجل بــــاجر جهزتهه
لاتكلي أوداع يمه = اتمـــــوت أمك لوعفتهه
ليش ســاكت ياحبيبي = الليله أمك عذبتهه
ساكت وعالسيف عينك شنوا يوليدي تريد
تعوف أمك للرزايه وعني اتســـــافر بعيد
ويـــــن نلتم يجاسم
مااظن تسلم يجاسم
ــــــــــــــــــــــــــــــــــــــــ
اشموع عرسك من شفتهه = صرت اتعذب واعاني
أظن هالليـــله ألاخيره = اويــــــاك يجمعني زماني
بعده جـرح الحسن بيه = انوب أجــاني جرح ثاني
لوشلت جرحــك يجاسـم = أعتبر مـوتي لفـــاني
انه بس طولك اشوفه يروح كل تعبي يجاسم
يهون كل سهر الليالي كون بس ترجعلي سالم
والدهر حتم يجاسم
ما اظن تسلم يجاسم
ـــــــــــــــــــــــــــــــــــــــ
لزفتك يبني أتاني = وحسب أيـــــام وليالي
هيه بس أمنيه عندي = بيــدي أزفنك يغالي
أتزفك اسيوف المنيه = يبني ماحسبت تالي
عالثره وطـيح جثه = شلون يتصور خيالي
جبت كل العمر انـــــزف ماأريدن تـالي افكدك
شلون من باجر اشوفك نايم اعله الغبره خدك
وحنتك من دم يجاسم
ما اظن تسلم يجاسم
ـــــــــــــــــــــــــــــــــــــــــ
جبار البطاط
ليست هناك تعليقات:
إرسال تعليق