الأحد، 10 نوفمبر 2013

وداع الليله ياحيــــــــدر__جابر النجفي

وداع الليله ياحيــــــــدر === إخوتي يمـّي وأتــْحـَسـّر
گلب مجروح === إو تون الروح
إخوتي يمـّي وأتــْحـَسـّر
ــــــــــــــــــــــــــــــــــــــــــــــــــ ــــــــــــ
إخوتي يمـّي وأتحســّر يبو الحسنييــــــن == وذا باچــر مشه عنـّي إو تركني إحسين
شلون أصبر بعد عينه يبو الطيبين == لازم ما تهل دمعه إو تصب العين
والليله وداع الروح === باچـر مهجتي مذبوح
والعباس === راعي الباس
يفارگني إبــْدِمـَه المنحر
ــــــ
ياليلة وداع إحسين لاتمشيـــــــــــن == خلـّيه الفجر ما يطلع إو مــَيـْبين
أريد أشبع وداع إلأخوتي الطيبيـــــن == باچــر ما يظل واحد تشوفه العين
سوادچ خـَل يظل مـَيـْزول === أريد إموادع المأمــــــــول
إخوي إحسين === وداعه الحيــن
يودّعني إبحزن يكبر
ــــــ
أريد أمشي لعد خيمة كفيلي أســـأل == أگلــّـه إشلون تتركني يــَخــَيْ تقبل
يبو الغيره عرفتك من علي تنهــــل == شهامه إو جود ما تقبل يـَخـَيْ أنذل
ما تقبل خيالي إيلوح === بس باچـر تريد إتروح
تفارگ دوم === ياجيـــدوم
وظل آني أسير البر
ــــــ
وإبظلمة سواد الليل إجـَت أمــــــــّي == تريد إتشارك إبحزني إو عظم همـّي
صحت يايــُمــّه باچــر ما يظل حلمي == يروحون إخوتي عنــّي الغريبه أسمي
بعدهم ما أذل هيهات === أهزها الدنيه بالآيات
وعد مكتوب === دليلي إيذوب
بس أكشف خفايا الشر
ــــــ
عد عيناك ياخويه گلت لحسيــــــــن == لصير الثورتك رايه إو عزم مـَيـْلين
آني إختك يبو اليمـّه إو فده للدين == لخلــّيها الحرم وأطفالك إبهل عين
لفضح كل أميـّه إبزود === وأرضي خالقي المعبود
أنادي العار === للأشـــرار
أميــّه إو كل غبي إتجســّر
ــــ
ربــّاني علي ياخويه عالخيرات == زرع بيـّه الكرامه ما أذل هيهات
أصبر ما يهمني الشر ولا البلوات == أدري للمجــــــد تمشي يبو الطيبات
تصير إبكربله عنوان === تشع أنوار للأكوان
عليك إتحوم === يامظلــــوم
ملائكة السمه تحضر
ــــــــــــــــــــــــــــــــــــــــــــــــــ ــــــــــــــــــــ
مع تحيات شاعر أهل البيت / جابر النجفي
إسمعوا القصيده على هذا الرابط
http://www.alshiaclubs.net/upload/do.php?id=5231

ليست هناك تعليقات:

إرسال تعليق