وداعة الله .. يا ربـــــاي ودرتي__علي العابدي النجفي

وداعة الله .. يا ربـــــاي ودرتي
وداعة الله .. يا صباي وشيبتي
ويا وداع بـلا رجوع
لا زفاف ولا شمــوع
وكَدت يمّه الضلوع .. وداعة الله
********
يمه يا سهر الليالي .. يا ذخـــــــــــر ايام شيبي
وداعة الله يا حبيبي .. انكَطـــــــــع منك نصيبي
بيدي شمعه بعيني دمعه .. زفك لمــوتك نحيبي
يالعفتني بلايا رجعه .. صــــــــوبتني يا طبيبي
آ ييمه .. وين الوذ بحسرتي
آ ييمه .. حيره يبني حيرتي
يم رباك انه انحنيت
شرد اكَله لو مشيت
بيش اسولف لو حجيت .. وداعة الله
**********
حضني يسال يا حبيبي .. وعطرك الغافي اعله متني
والليـــــــالي يمه جــــاسم .. بالـدللــــــــــو دوهنتني
شرد اكَلهن وانت صوتي .. وبرحيلك سكــــــــــتتني
بس بقت كلمه بلساني .. وداعــــــــة الله يالعفتني
كل شي اخذته .. شعندي يمه الكبرتي
كل شي اخذته .. وما خذتهــــــا لوعتي
هذي اكبر مــن تغيب
يا جروحي الما تطيب
منين الي بعدك طبيب .. وداعة الله
********
هذا حدها وياك عـيني .. لوغبــــت عنها اشيردك
غايب يسجلك زماني .. والكَــــبر حاضــــر يعدك
ابكثر ناغيت امك .. وبكـــــــــــــثر هزّاك مهـدك
وبكثر ضمّاك حضني .. راح اكسر ضلوعي بعدك
انت وحدك .. لليالي شمعتـــي
انت وحدك .. كل نصيبي بدنيتي
يالعفتني للجـــــــــــــروح
شعندي بعــدك من تروح
الدنيا مــــوت وانت روح .. وداعة الله
***********
يبني صعبه وحيل صعبه .. لا تظنها كلمه سهله
من اكَلك يا حبيبي .. ويا نصيبي وداعـــــــــة الله
لكن الاصعب ييمه .. حـــــــــــسين يوليدي شكَله
قدّمت ليلى كَلبها .. وشتقــــــــــــــــدّم لجله رمله
شفته وحده .. يا مصــابي ولوعتي
شفته وحده .. وانت وحدك فزعتي
آنه ما عنــدي اختيار
غير اصيح وكَلبي نار
اسمع الهذا القــــــــــــرار .. وداعة الله
*********
يبني روح وداعة الله .. يا حبيبي وانســــــــى امّك
فدوه لجلك عمري يمه .. وفدوه عمـرك لجل عمك
المنايا خل تزفك .. حنـّـــــــــــــي اديك بفيض دمك
بس تعال انطيني لحظه .. لحظـه وحده خل اشمك
شرد اكَلك .. يبني ذابت مهجتي
شرد اكلك .. هذي يمه وصيّتي
مودّع بدمع الحنين
يا حبيبي والـــونين
فدوه طولك للحسين .. وداعة الله