انه كطعوا نحري_كرار حسين الكربلائي

عند شباك السيده رقيه ع
وجدت داخل الضريح مكتوب
( اين انت يا ابي)
فكتبت هذه الابيات هناك وكان بمعيتي خادم حرم العباس ع الاخ علي الحسين فوزي
فقلت
....
آنه گطعو نحري
يا حبيبة عمري .. يا رقيه
....
آنه ابوچ الطوّل اعليچ بمغيبه
سامحيني جيت والشيبه خضيبه
دمعچ يأذيني كافي يالحبيبه
دمعي لجلچ يجري
يا حبيبة عمري .. يا رقيه
...
راسي فوگ الرمح وانظرهم يعذبوچ
يا رقيه وبالحبال گبالي چتفوچ
طفله بسياط العده گامو يضربوچ
وحتزمت بصبري
يا حبيبة عمري .. يا رقيه
....
آني اسمع ونتچ لمن تونين
ومن تجين لزينب وعني تسألين
من تخافين بعبايتها تلوذين
صحتي حرت بأمري
يا حبيبة عمري .. يا رقيه
...
عيونچ بگثر البواچي مذبليها
ويلي ورسومچ حلوه مغيريها
حته ترچيتچ يبويه مسلبيها
آيمحنة دهري
يا حبيبة عمري .. يا رقيه
...
هذا راسي وشاهدي شيبه وخضابه
اني هم مشتاگ اشوفنچ ييابه
لو عدل لا ما تنامين بخرابه
ليچ اقدم عذري
يا حبيبة عمري .. يا رقيه
...
شُبگي نحري وخل توافيچ المنيه
انتي برض الشام دفنچ يارقيه
راسي رايح يندفن بالغاضريه
بعيد عنچ گبري
يا حبيبة عمري .. يا رقيه
...
اسألكم الدعاء
كرار حسين الكربلائي
( ابوكميل)