دمعـكم لاتـهلونـه علـيه ** يشيعه لو دنت ليه المنيه
كل البچـي والـنوح
على والدي المذبوح
انه زين العابدين
----------------------
اذا حـَلـت منيـتــي وبـتده اوداعــي
ويمي اجتمعو اهلي وصحبي واتباعي
لاتنعـون شـخصي لــو نعــه الناعي
انــه ابكـربله مـاســحگو اظــلاعي
اعليه ما اريد اتهل العيون ** بس لحسين ونَكم من تونون
والله الگلب مجروح
على والدي المذبوح
انه زين العابدين
----------------------
أنـي راح امـوت ابــينكـم أني
وهـسه مستعد يدفـني دفاني
وابويه ابلا دفن ياشـيعه اذاني
ثلاث ايام جثـته ابكربله اتعاني
اگول الهالسبب نوحو المصابه ** ظل ابـلا دفــن فوگ الترابه
حـقه الدمع مسفوح
على والدي المذبوح
انه زين العابدين
----------------------
يامسموم صحـتو والدمع هالي
مجروحين اجيتو اليوم عن حالي
مو سم ال امــيه المـرد دلالي
تره سهم المـثلث گـَطع اوصال
بالطف شفت ابويه اعله الوطيه ** مــن ذاك الوكت ردت المنيه
روحـي رادت اتروح
على والدي المذبوح
انه زين العابدين
----------------------
عـَلـيه الآه لتـجذبـون والحـسره
حالي يابشر لا مــو عجـيب امره
راسي عالوساده مو على الغبره
وابــويه عـالوطـيه مـنگطع نحره
مأسي ماشفت من هالمأسي ** يريت ابكربله منگطع راسي
وخلي اتروح هالروح
على والدي المذبوح
انه زين العابدين
----------------------
الـمـنيه صــح اجتنـي وگربت ليه
بس جســمي سليم وجــرح مابيه
وحــسين ابو اليـمه جــثه مرميه
جروح بجسم ابوي الف وتسع ميه
لمَن طـاح ريحــانة الهادي ** وذرت جثته سيوف الاعادي
الحزن خليته مفتوح
على والدي المذبوح
انه زين العابدين
----------------------
كــل انـسان لمـن تخــمد انفـاسه
طبيعي اتشيعه اهله وصحبته وناسه
وابو الـيمه تشـيّع عالــرمح راسـه
اويــلي راس ابويه اشگد آلم قاسه
تمنيته راسي فوگ الرماح ** ولا راس ابويه لليسر راح
ابعيني ذكرته اتلوح
على والدي المذبوح
انه زين العابدين
----------------------
تمت والحمد لله في 25/ 11 / 2013
خادم الحسين حيدر تركي الكربلائي
ليست هناك تعليقات:
إرسال تعليق