لمهدك الخالي دمعتي لنحرك الدامي حسرتي
_____________
بسهم من كطعو وريدك كطعو بتوت الامل
مثــــل دم نحرك يـيــمه دمــعي لغيابك همل
حجري يسأل وينك انته والمـــهد عنك سأل
وآنه احس كلشي يكلي وين عبد الله رحل
الليله مطفيه شمعتي لنحرك الدامي حسرتي
_______________________
من كثر ما يجري دمعي نشف جفني من الدمع
وعاشـــــرت بعدك ونيني وصـــــــارت الونه طبع
فرع من شـــــــجرة محمد وانــــــكطع ذاك الفرع
انته صاب السهــم نحرك وآنــــــــــه محنية ضلع
يولدي غربه غربتي لنحرك الدامي حسرتي
__________________
شكثر لوليت اعله مهدك وشكثر يـــبني اســــــهـرت
وصار ست اشهور عمرك كمــــــر بعيــــــوني صــرت
من عـطش كلبـك ييـمـه والله حيره اتحــــــــــيــرت
ولون ادري تموت ضامي جـــــــان لعيوني اعصرت
بغيبتك هذي حالتي لنحرك الدامي حسرتي
_______________________
مصيبتك يابعد روحـــي فطرت جبد الســــمه
رحت للجنه وعفتـــــني لـلنياحه محــــــزمـــــه
والده وتشوف ابنــــــها مخضب بفيض الــــدمه
الموت اجاك بزغرسنك مثـــــل محسن فاطمه
محنة الزهره محنتي لنحرك الدامي حسرتي
__________________________
دوم اسولف بيك يبني وعـــدل يمي اتصورك
شمايمر اليل بيه شكـــد احـــــن واتـــــذكــرك
يبني كل ساعــــه اكولن يـــــرجــــع واتنــــطرك
انت لوعباس يــــــمك مـــنهو يكطــــع منحرك
لصاحب الغيره ونتي لنحرك الدامي حسرتي
______________________________
ريت وكت الموت اجاني واسكن بوسط الكبــر
والله مليت المنـــــــاحه والمــــدامــــع والــــصـــبر
شما شربت الماي اذكرك والــــــــتفت بلجن تمر
ماتجيني و احــــــس مو بالماي اشـــــرب بالجمر
بعدك بكلبي جمرتي لنحرك الدامي حسرتي
_________________________
خادم الحسين (عليه السلام)
كرار حسين الكربلائي
ليست هناك تعليقات:
إرسال تعليق