مسـافـر وعـايفنـي وَحــدي ... ليـش بـويــه
تخلـي دمعاتـي إعلـه خـدي ... ليـش بـويــه
هَــم وحيـده وهَــم علـيلـه *** جـدمـي مـا إﮔــدر إشيلــه
ليـش بـويــه ..... ليـش بـويــه
ــــــــــــــــــ
للسفـرعـازم إشـوفـك بويه يا ضي العيـون
كون تمشون إبسلامه وبإمـان الله تجــــون
لحظه إريدك يَمي تـﮕـعد ها يوالدنه الحنون
إبغيرك آنه بويه تدري ما كنت والله وإكون
يبـﮕـه بـس الهَــم إليِّـــه ... ليـش بـويــه
دمعتي إعله الخد جريه ... ليـش بـويــه
إدري بالسفـره طـويلــه *** جـدمـي مـا إﮔــدر إشيلــه
ــــــــــــــــــ
آنـه مـن دون البنـات راح إضل بالإنتظـار
اليوم لا باﭼـر يجـون إنتظـر لـيـل ونهـــار
الكربلـه إتصد العيـون بويه وبـدلالـي نــار
يمتـه ترجع يا حُسـين يمتـه وإتـرد للـديـار
تـاكــل الحســرات بيـــه ... ليـش بـويــه
بس خـذت سكنه ورقيـه ... ليـش بـويــه
والـدمـع مـن دم إسيلـــه *** جـدمـي مـا إﮔــدر إشيلــه
ــــــــــــــــــ
مـا إنـام الليـل بعـدك راح إﮔـَضّي بالنحيـب
وإنت تدري العلته كلفه بس يداويها الحبيب
شلون يالمحبوب إصبر وإنت من عيني تغيب
علتي وعلـَّة سفرتك بـيَّ ﮔلي إشلون إطيـب
تعـوفني بهـاي المصيبه ... ليـش بـويــه
راح إضل مثل الغريبـه ... ليـش بـويــه
دمعـي مـا بَطـل مسيلــه *** جـدمـي مـا إﮔــدر إشيلــه
ــــــــــــــــــ
إقسم إبضلع الزﭼيه إعليك وبحامي الدخيـل
خذني بويه وياك للطف حتى لو ما بيه حيل
إخدمك راح بسفرتـك حتى لو حملي ثجيـل
لا تخليني إبوحشتي هنانه بس دمعي يسيل
إبـﮕـه بهمومي ومصابـي ... ليـش بـويــه
وإبـﭼـي من لوعة عذابي ... ليـش بـويــه
إعضاي من الهَم نحيلـه *** جـدمـي مـا إﮔــدر إشيلــه
ــــــــــــــــــ
راح إسلــم إمـري لله والصبــر هـــوَ دواي
يمته ترجعلي وإشوفك شوفتـك بيهـا شفـاي
بـويـه علتـي من تجينـي راح إخليهـا وراي
وإنسه علتي يا حياتي ويا بعد كلبي ومنـاي
راح إضل لشوكت إتاني ... ليـش بـويــه
وإحسب الجيتـك ثـوانـي ... ليـش بـويــه
تـردلـي ويِّ عمتي العقيلـه *** جـدمـي مـا إﮔــدر إشيلــه
ــــــــــــــــــ
البطل عباس عمي بيك إوصي آنـه إريــد
لا تعوف حسين إخيـك هالله هالله ها يَحيد
ضحي بالـﭼفين لجلـه وعينك ودم الوريـد
لاتعوفه هناك ضامي بكربله عمي وحيـد
معتنـي الإرض المنيـه ... ليـش بـويــه
وهمـي يتكـاثــر عليــه ... ليـش بـويــه
إمـري راح إلمـن تحيلـه *** جـدمـي مـا إﮔــدر إشيلــه
ليست هناك تعليقات:
إرسال تعليق