گبل ما ترتحل عني ..... اودعك خويه خليني
يامن عالبعُد نــاوي ..... تدري الفرگه تاذيني
عباس ياعباس
ــــــــــــــــــــــــــــــــــــــــ
إنه امدلله بجالك \ اخت عباس موصوفه
محميه چنت بحماك \ خيالي محد ايشوفه
الخدر مني اخذ خدره \ ام الخدر معروفه
تريد اتروح ياخويه \ بعدك منهو يحميني
عباس ياعباس
ــــــــــــــــــــــــــــــــــــــــ
بعزه وهيبه من امشي \ وخدري الي يجللني
بيه اتحيط من كل صوب \ وبســيفك تظلـلني
عليه من النـسيم الهب \ تغــار ولو يــمر مني
ابو الــغيره يسمونـــك \ بــعدك من يــباريني
عباس ياعباس
ــــــــــــــــــــــــــــــــــــــــ
انه زينب يبو فاظـــل \ اختك من ينـــادوني
واذا انته غـــبت عني \ ما ادري شـيسموني
اخت الگــطعو چفوفه \ بأسمك والله ياذوني
صعبه تدري من دونك \ بحاجه ليك تدريني
عباس ياعباس
ــــــــــــــــــــــــــــــــــــــــ
طلعت من الوطن انه \ وياك واجيت وياي
صدرك ليه دگـــيته \ يازينب گلــت بحماي
تريد انته تخليني يكافل\ خدري بــين عداي
بعدك وين اروح انه \ فگـــدك خويه يعميني
عباس ياعباس
ــــــــــــــــــــــــــــــــــــــــ
ابو الغيره واشيل الراس \ اگـول الي تكفلني
على الناگه بخدر واجلال \ بيدك من تركبني
الهلي لو ردت ارد انه \ مـنهو الـي يرجـعني
تتركنـــي وتروح بعيد \ بــدياري شـــيدليني
عباس ياعباس
ــــــــــــــــــــــــــــــــــــــــ
بحاجه ليك ياخويه \ انه اختك يبو الغيره
اليوم انته التباريني \ وباجر اصبح بحيره
زينب لو لفاهه الــهم \ وجهه المن اتـديره
بعدك ياگمر هاشــم \ تدري اعداك تاذيني
عباس ياعباس
ــــــــــــــــــــــــــــــــــــــــ
على الشاطي تظل مرمي \ والچفين مگطوعه
وزينب من يحـــاميهه \ عليهه اعـدك مجموعه
اصيح عليك مو يمـــي \ واظل بلوعه مفجوعه
بــيدي استر بوجــهي \ اذا العـــدوان تربينـــي
عباس ياعباس
ــــــــــــــــــــــــــــــــــــــــ
اودعك وبدموع العين \ گبل ماتنرمي عينك
واصيح بصوت ياعباس \ خويه يانـفل وينك
مرمي وما ترد جواب \ على التربان چفينك
يريت الگطع چفوفك \ گطـع خويه چـــفيني
عباس ياعباس
ــــــــــــــــــــــــــــــــــــــــ
هذا اخر وداع وياك \ وباچر امشي مسبيه
ادري ماتــفارگـــني \ روحــك بيه مبنـــيه
راسك يمشي ويـــانه \ وجتثك تبقه مرميه
ياعباس ماظنيت \ اعداكم خـــويه تسـبيني
عباس ياعباس
ــــــــــــــــــــــــــــــــــــــــ
خادم الحسين حيدر تركي الكربلائي
ليست هناك تعليقات:
إرسال تعليق