والله لو دهري يجود ____ والضعن ليّه يعود
بسمه افراحي ترد ____ وعالدرب انثر ورد
والضعن ليّه يعود
*▶●◀*▶●◀*▶●◀*▶●◀*
ياگلب بسّك عليه .... مللتني من الاماني
والامل ساعاته طالت .... جروح هيّجهه ابكياني
من الحنان انحرم گلبي ..... ويه ابويه كل حناني
راحو اهلي وگالو انرد .... لا خبر منهم اجاني
&&
تحيه انفاسي أبأمل ____ انتظر طبت الاهل
تمرّد أگليبي مرد ____ وعالدرب انثر ورد
*▶●◀*▶●◀*▶●◀*▶●◀*
أه يا ليلي شوصفك ..... بگلبي ساعاتك خناجر
چم طفل ويه اهله سامر ... وآنه وي احزاني اسامر
شلون يوصلني خبركم ..... يهلي بيكم گلبي حاير
يا لغوالي عيوني يمكم ....... الكم ابكل لحظه أناطر
&&
تعّبت ليلي الحزين ____ رافگ أگليبي الونين
ولليمر عيني تصد ____ وعالدرب انثر ورد
*▶●◀*▶●◀*▶●◀*▶●◀*
وجودك أيمثل حياتي ..... وانته بسمه ويه طبعي
وي سگم جسمي يبويه....صوتك ايعيش اويه سمعي
وي صلاتي تعيش لهفه .... ونثرّ أحزاني اويه دمعي
وصرت استحضر دعائك ...... أفرش امصلاتي ودعي
&&
يجبل الليل ويروح ____ علّه وهموم وجروح
أحسب انجومه وعد ____ وعالدرب انثر ورد
*▶●◀*▶●◀*▶●◀*▶●◀*
الشعر يعجز يوصف ...... حزني وهمومي بقصايد
وانه طفله وضيمي يصعب ..... فارگت اهلي الاماجد
جنت آنه وي رقيه ...... بلهفه نجبل على الوالد
من نجيه انزيح همه ...... ومن نحضنه وهوه ساجد
&&
يارقيه هم تجين ____ بگلبي الچ فاض الحنين
مانسيتچ عالبعد ____ وعالدرب انثر ورد
*▶●◀*▶●◀*▶●◀*▶●◀*
بويه گتلي أواعدتني ........ أدزلي مرسول أويجيني
وين ماقرّت أضعونك ...... يجي عمي ونظر عيني
لو يجيني خيّي الاكبر ...... يجيبني ويسكن أنيني
وانتظر ساعة لقآكم ...... الكم اتفايض حنيني
بويه عن حالي شتكول ____ ما أجه منكم رسول
وشتعل نار الوجد ____ وعالدرب انثر ورد
*▶●◀*▶●◀*▶●◀*▶●◀*
بهمتي أتگوّه أعله علتي ...... وردت اكتبلك رساله
الحبر دمعة اعيوني ....... والوصف متني حناله
حرت ويآمن أدزهه ...... بويه وشكيلك الحاله
شح عليه الطارش اني ..... وعني ضاعت كل دلاله
&&
شاب راسي امن الزغر ____ يلهب ابروحي الجمر
گلب طفله مو جلد _____ وعالدرب انثر ورد
▶●◀*▶●◀*▶●◀*▶●◀**تمّت
بقلم الشاعر الحسيني
سيد محمد ابورغيف
ليست هناك تعليقات:
إرسال تعليق