مثل اختي رقية_حيدرتركي الكربلاي1436

أحلـفــك بـالــزچـيه ** يـبويه رد علـيّه

إخذني الكربله اوياك ** مثل اختي رقيّه

● ● ●

يهالناوي عالهجر . والله ما بـيّه صبر

اتگلـّـي انتظري يبويه شلون آنه انتظر

ليش منّي تعـتذر . گـلبي تدري ينكسر

فاطمه بنتـك عليله وبيها نارك تستعـر

علـيـك الله ونبــيّه ** أحلفك بالزچـيّه

إخذني الكربله اوياك ** مثل اختي رقيّه

● ● ●

فاطـمه متأمّـله ... ويّــه اهـلها راحـله

شلون يقبل گلب ابويه ايعوفني متعلعله

گلـْت اروح وأسأله ... آنه عـنده مدللـه

حالي حال اختي رقـيّه انروح كلنه الكربله

تحـت ظــلك ســويّه ** أحلفك بالزچـيّه 

إخذني الكربله اوياك ** مثل اختي رقيه 

● ● ●

هالسفر گتلي صعب ... وما تحِـمْـلين الدرب

شـلون راح احـمل افراگك آنه عندي چم گلب

والـزغـيره تـنــتحب ... من يروح الهـا محب

من ينشّـف دمـع عيني لو على افراگك يصب 

زغـيــره عــالأذيّـــه ** أحلفك بالزچـيه

إخذني الكربله اوياك ** مثل اختي رقيّه

● ● ●

اوياك اخذني ابهالسفر ... ما أبالي بالخـطر

هوهَّ بــويه الموت واحــد قابـل اخلد بالدهر

صعب اصبر چم شهر ... والله يذبحني القهر

مـن بــعد عيـنك يبـويه ما تفـارگني الصـُوَر

حــلِم واتمــر عـلـيّه ** أحلفك بالزچـيّه 

إخذني الكربله اوياك ** مثل اختي رقيه

● ● ●

خايف اعليّه انجرح ... وآنه اخاف امن الصبح

من يجـي وكـت النـهار ادمـوع عيني تنفضح

اعلـيك خلـّـيني اقـترح ... لا تهـاجر للـذبـح

آنه اخاف وتدري بـيّه بويه مـن كـلمة رمـح

منو غـيــرك إلـيّه ** أحلفك بالزچـيّه

إخذني الكربله اوياك ** مثل اختي رقيه

● ● ●

اخواني كلهم بالضعن ... اتگلي ظلي بالوطن

شـوف يا بـويه رقـيّه اعــيونها لجـلي بـچن

النوگ لو عني مشن ... لا تظن احمــل محن

لــو تــرد تلـگاني ميـته لو اعيـوني يــنعن

أظـن تلفــي المنـيّه ** أحلفك بالزچـيه

إخذني الكربله اوياك ** مثل اختي رقيّه

● ● ●

حيدر تركي الكربلائي

تمت والحمد لله في 13/ 9 / 2014