يا كافل عفافي_موسى الشغباني

يا كافل عفافي   اجيت وجدمي حافي
اجيتك للشريعة   يبوجفوف القطيعة
****
اجيتك للنهر عباس  ماجاية اشرب ميّه
وماجيت اشتكي يمك  حن قلبي وطلع بيه
طبع الرايد يسافر  كون يودع اهاليه
خوية وداعة الله وياك  بس راح امشي مسبية
خدري الي بوجودك  تبدة وية جودك
قلت يمك نسيته  خدري وما لقيته
****
اجيتك للشريعة شلون   جية بلا قلب لاروح
واعذرك ماسمعت الصوت   من كد ماصحت مبحوح
ياراية هلي الطاحت   عالمثلك يطول النوح
والعدها اخو مثلك   منو يصدك سبية تروح
يا دورة زماني   من يمك سباني
امد ايدي على ايدك  تمشي وياي اريدك
****
راح امشي يبوفاضل  بس بيا بخت امشي
يالستري وقف باسمك  عين انا وصرت رمشي
انت امي وعلي وحسين   انت الزينبك كلشي
كبلك جنت اهوى الموت   وانت التطلع بنعشي
انت كل حياتي  يا خيمة خواتي
يعباس على بختك  اضيع وانا اختك
****
اجيت وياك اتناشد   هم مرت على بالك
زينب تمشي وي غربة  واديهه مجتفة قبالك
رضيت انا امشي ويه اجناب  انا وباقي عيالك
 بس ما مرت ببالي اتماشى ويه جتالك
دير عليه شوفك  يمن فدوة لجفوفك
تجي بسمي الاجانب  هاي ام المصايب
****