جفني مانام وغفه ** چم نورمن عندي طفه
والگمر من ليلي غايب
*******
جدي هادي الناس كلهه ** عنده اسرار اليقين
والولي حيدر وصـــــيه ** بعده امير المؤمنين
تركو انوار الهــــــــدايه ** للحسن ويه الحُـسين
ضدهم اتحزمت اميه ** لا شــــــرع عده لا دين
حاربونه بكل صلافه ** والسبب كله الخلافه
اهلي سر المعرفه ** چم نورمن عندي طفه
والگمر من ليلي غايب
***********
طفله مالومه وحزينه ** اظلم بعيني النهار
هالزمن ضدنه يتحزب ** تجدح عيونه بشرار
بكربله شفت العجايب ** ماضگت بس المرار
انتـــــــظر جية ولينه ** تمــررت بالانــــتظار
صعبه اشرح هالمصيبه ** بأول سنيني غريبه
اّنه جدي المصطفه ** چم نورمن عندي طفه
والگمر من ليلي غايب
************
اّنّه والدمعه وشجوني ** وگلبي يصرخ بالجروح
حزني مااگــــدر اضمه ** ظــــــاهر وكله وضوح
دنيتي صارت مظـــلمه ** لــــــيلي وانهاري ينوح
بويه ماتنفــــــــع حياتي ** انته لو عنــــــي تروح
روحي مشتاگه تشمك ** بونتي يم صدري اضمك
بعدك الروح مجتفه ** چم نورمن عندي طفه
والگمر من ليلي غايب
************
عمتي محتاره بامرهه ** من بعد نور الكرام
ضاگت الوسعه عليهه ** وانفگد منهه السلام
واسمعت تـــندب يبويه ** لهـــمت النار الخيام
والشمس غابت علينه ** والوكت اصـــبح ظلام
لا زلم ظلت تحامي ** لا نصير ولا محامي
اطهر دمانه نازفه ** چم نورمن عندي طفه
والگمر من ليلي غايب
************
انته يابـــويه الاماني ** وانته منبع للحنان
بويه يامهجة حياتي ** انته چنت النه ضمان
انفگدت امالي بغيابك ** وانفــــــگد كل الامان
شفنـــــــــــه الام واذيه ** والصبر صار امتحان
هاذي حالتنه بغيابك ** والجره وصار بمصابك
بعدك على الدنيه عفه ** چم نورمن عندي طفه
والگمر من ليلي غايب
*********
رؤيه شفت اّنّه بمنامي ** غافيه بحضن الحنون
شفتك انته والعـــــقيله ** توصي عمتي بالضعون
لني مرعوبــــــه وانادي ** يمــــــته يابويه تجون
والصبح طلعت صرختي ** تصــرخ اوياهه العيون
جابو الراس وسبوني ** وبظلمهه موتوني
صحت يااهل الوفه ** چم نورمن عندي طفه
والگمر من ليلي غايب
ليست هناك تعليقات:
إرسال تعليق