تسيل دموع ** تون ضلوع ** يخويه ومهجة الزهره
يبو محمد ** فلا تبــــــــرد ** تــظل نيراني مستعره
*******
ابقه الياوكت انحب ** اظل چــــــم دوب اتصبر
بعدني مانسيت امي ** ومايبــــــــرد جرح حيدر
يخويه ولو غبت عني ** يظل جمر الگلب يسعر
الاخت لو تفگد اخوتهه ** بمشـــيهه تگوم تتعثر
بالخوان ** تهيد احزان ** وتهون الونه والعبره
**********
حزنچ ياضوه عيوني ** من أُمي اخــــــــــذ طبعه
زمانـــــــــچ كله يتغير ** بعــدي ينـــــگلب وضعه
صلاتچ يختي دستورتچ ** يبضعة فاطمه البضعه
وصيتي يختي بعيالي ** تصيري بليـــــلهم شمعه
الزمن لودار ** تمر اخطار ** غريبه تصبح العتره
*******
يخويه كثره احزاني ** تدري يالحسن بالهم
بوجودك ويــه خواني ** يخـــويه بيكم اتشيم
تدري لو غبت عني ** اظـــــل محتاره واتألم
نصيبي النوح والدمعه ** هاذي الدنيه ماترحم
نحيب ونوح ** عليله الروح ** ابد ماتنطفي الجمره
*********
يختي حسين من بعدي ** يعــيش محنه وبغربه
يـومي مو مثل يومه ** تصــبح محــنته صعبه
تطيح اخوانه وانصــاره ** ومثلث ينبت بگلبه
يختي ولو تشـــــوفينه ** اريدچ صابره وصلبه
تجري ادموم ** وعد محتوم ** وحيد ومحد ينصره
******
الزمن مايوم يرحمني ** مصايب كثره راواني
اظل الياوكت انحب ** واعيش بلوعة احزاني
حچيك ياابو محمد ** هضـــــمني وحيل اذاني
شلي بدنياي وبعمري ** يـــخويه بغير خواني
اريد اجواب ** الفگد احباب ** شنهي لذته بعمره
*********
يزينب يختي اسمعيني ** شدي حـــيلچ بصبرچ
رغم كل الحزن يختي ** يبــــــــقه مرتفع قدرچ
مصابي يهون يازينب ** مصابچ اعظم ويسرچ
تظل وياچ رايـــــــتنه ** وتذلين الـــعده بخدرچ
والموعود ** يرد اردود ** يفـــــــجر لجلچ الثوره
ليست هناك تعليقات:
إرسال تعليق