ارجوك تانيني_حيدر تركي الكربلائي

يالرايد تروح ارجوك تانينــــي
ما اگدر انه بلـــياك تدرينـــــي
يبــويه لـو تحبـــني
اخذني وياك اخذني
ما اگدر انه بلـــياك تدرينـــــي
ـــــــــــــــــــــــــــــــــ1ــــــــــــــــ ــــــــــــــــــــ
انه فاطمه بنتك يا ضوه العين .... اريد ارجاك رجوه
بعد عيـــنك يبويه اتـــجه وين .... وانه المهجتك سلوه
انه بعدك غزتني مصايب البين .... الدهر بعد شـسوه
فديــتك انه بنتـــك ام الحــــسين .... رحتــلك انه فدوه
بعد عيـــــنك يـــــبويه ما اريدنــــهه
حياتي بغير شخصك لو رحت عنهه
فگد شخصك ضهدني
اخذني وياك اخذنـــي
ما اگدر انه بلـــياك تدرينــــي
ما اگدر انه بلـــياك تدرينـــــي
ـــــــــــــــــــــــــــــــــــ2ــــــــــــــ ــــــــــــــــــــ
شلون تخلي بنتك بويه بالدار .... وتــــعرفهـه حــــــنينه
رقيقه وبالعجل تدريني انـــهار .... يســــموني الـحزينــه
انه حزني صبح ماينوصف صار .... صرت لجله رهينه
مديــنه للـــــحزن انه والاعبـــــار .... صرت اكبر مدينه
يبويه الناس لو تدري شيسموني
ام الحزن اسمي بس يعرفونــي
وإلم بعدك يــــهدني
اخذني وياك اخذني
ما اگدر انه بلـــياك تدرينـــــي
ــــــــــــــــــــــــــــــــ3ـــــــــــــــــ ــــــــــــــــــــ
يبويه شلون اصابر بعد شلون .... سهم بعـدك رماني
بعد عينك اريد اعميهه العيون .... وخل يـشهد زمـاني
عمتني مصيبتك والناس يدرون .... إلم هجرك عمــاني
اريد انحب عليك ويسمع الكون .... فگد شخصك دهاني
حزن روح القٌدس وينوح الي بعبره
واملاك الـــجليل بحـــزني متــــائره
مصيبه ودوهـنتني
اخذني وياك اخذني
ما اگدر انه بلـــياك تدرينـــــي
ــــــــــــــــــــــــــــــــــ4ـــــــــــــــ ــــــــــــــــــــ
سهم نايبة دهري صوب الحال .... وتركني بهالمصيبه
شيجيب الرحل لو طول الترحال .... بعد گـــلي شيجيبه
غريبه من بعد عـــينك بالاهــــول .... صرت انه غريبه
على وجهي الدمع يتجاره شــلال .... يچـــويني بلــــهيبه
لو ترجع الي وتشوف هـالونه
المصايب يالأبو الحالي ينوحنه
غزتني وحيرتــني
اخذني وياك اخذني
ما اگدر انه بلـــياك تدرينـــــي
ــــــــــــــــــــــــــــــــــــ5ـــــــــــــ ــــــــــــــــــــ
عودنـــي حنانــــك عالمــــوده .... ياشمعـــة حيــــاتي
البُــــعد يابويه بعــدك من يســـده .... يــظل بيه المماتي
اخذني وياك بويه بـــــلايه رده .... وحـــقق امــــنيــاتي
يــبويه العمــــر لو راح شـــــيرده .... شيرجع ذكرياتي
يبويه ذكرياتك عايشه بعيني
ولايمكن افارگهه وتجافيني
ذكراك اسـرتنـــي
اخذني وياك اخذني
ما اگدر انه بلـــياك تدرينـــــي
ـــــــــــــــــــــــــــــــــــ6ــــــــــــــ ــــــــــــــــــــ
مايمكن يبويه اگـــدر انســاك .... اذا بــــس انـسه روحي
بروحي وبالكلب سجلته معناك .... وكتبته بنص جروحي
بكل لحظه بخــيالي ابقه ويــاك .... وذكرك حزن يوحــي
لنوحك يالابو وما انسه طرواك .... وازيد عليـــك نوحـي
انه حزني الك ماينوصف وصفه
اصحه عله الحزن وبونتي اغفه
المصايب ذوبتني
اخذني وياك اخذني
ما اگدر انه بلـــياك تدرينـــــي
ــــــــــــــــــــــــــــــــــــ7ـــــــــــــ ــــــــــــــــــــ
يريت العين تطفه وماتنظرك .... تروح انته من اديه
انه شفتك يبويه اتـــسلم امرك .... بأحـظـان المـــــنيه
روحي انشدت بروحك تخبرك .... على الي صار بيه
اخاف انسيتني ارد انه اذكــرك .... شنو الي گـلته اليه
بوصيتك يالابو من چنت توصيني
گـــــلت يافاطمه بعدي تلحگــيني
واذا انتــــه تودني
اخذني وياك اخذني
ما اگدر انه بلـــياك تدرينـــــي
ــــــــــــــــــــــــــــــــــــــــــــــــــ ــــــــــــــــــ
خادمكم حيدر تركي الكربلائي
22 صفر 1431