ياكفيلي .. من چنت وياك چان اسمي الأميره
ياكفيلي .. ومن بعـد عيناك سموني الأسيره
الك تـشرح دمعتي
يالأخو عـن رحلتي
يـــاكـفــيـلـــي
----------------------
مـن اجـيت اويـاك اني . اتحفني من اربع جهات
عالهـوه سيفـك تسـله . اتغـار لو من يمي فات
چـنت اتنفـس وجـودك . خويه احـس بيك الحياة
وسفه فگدك ماحسبـته . خذك من عندي الممات
ياكفيلي .. راح خدري وهيبتي وعزي ودلالي
ياكفيلي .. وصارت ايامي عـگب عيـنك ليالي
منين ابدي ابقصتي
يالأخو عـن رحلتي
يـــاكـفــيـلـــي
----------------------
خويه مامتوقعه لحظه . انسـبي مـن بين اديك
والدرب موصعب خويه . صعبه من سألو عليك
اشگد تمنينك تجـيني . اشگد چنت محتاجه ليك
اتـشمتو بيه ابغيابك . انـه مـو محـتميه بيــك
ياكفيلي .. سهم نظرات الشماته من رماني
ياكفيلي .. مثل عينك صوَب اعيوني وعماني
صعبه تسمع محنتي
يالأخـو عـن رحلتي
يـــاكـفــيـلـــي
----------------------
ظلي محـد شافه مـره . خـويه تتــذكر قــبل
چنت بالليل انته تمشي . خلفي لايظهر لي ظل
ردت هسه اتشوف حالي . بالسـبي يـابالـفطل
الــناس تتــفرج علــيه . لـَمن ابكل ديره اصل
ياكفيلي .. الناس كلها مـن امر تنظر عليه
ياكفيلي .. صرت استر وجهي ياخويه بديه
شلون اوصَف بلوتي
يالأخـو عـن رحـلتي
يـــاكـفــيـلـــي
----------------------
چـنت مــاترضه يخــويه . الورد لــو بيـه يمر
وهسه يتلوه اعله متـني . يالاخو سوط الشمر
گبل مـن امـشي حـمايه . وهسه بحبالي اجر
صحـت ويـنك يـبو فاضل . بعد ماظل لي صبر
ياكفيلي .. لو تجي وتشوف حال اختك يخوها
ياكفيلي .. بالـسلاسل والحـبل مــن گيدوها
الك اروي حـالتـي
يالأخو عـن رحلتي
يـــاكـفــيـلـــي
----------------------
خويه محتاجه مـحامي . امنين احَصل حامي لي
چنت بس تنظر اعيـوني . اتـصيح خـويه اتـدللي
وهسه مسـبيه وسـليبه . شـلـون اختـك تـنولي
ويــن ياعــباس وينــك . من سبـوها بــت علي
ياكفيلي .. هسه ماتعرفني من تنظر عليه
ياكفيلي .. مو نفس ماراحت اترد السبيه
غـيَرتني غــربتي
يالأخو عـن رحلتي
يـــاكـفــيـلـــي
----------------------
ردت لو مره اشوفك . حتى اسولف لك آلم
سوط من اسياط اميه . قصه لمصابي رسم
صرح صبري يبو فاطل . بالسبي والله انهدم
خاف آ أذيـك ابكلامي . وينلچم جرح السهم
ياكفيلي .. بيمن ابدي وانتهي عن هالمسيره
ياكفيلي .. والله حيـرني زماني شلون حيره
ادعي لله ابدعوتي
يالأخو عـن رحلتي
يـــاكـفــيـلـــي
----------------------
تمت والحمد لله في 2/ 12/ 2013
خادم
ليست هناك تعليقات:
إرسال تعليق