سكنه والطفله العليله امن التكن
عن ابوهن والمصاب اتناشدن
-----------------------
اتكلها ياسكنـه تــركنـي ابــوحّــدي
وانتي رحتي اوياه من صار الحدي
جفني طول اغيـابـكم عالـخـد نــدي
وبالليالي اعيوني هاجرها الوسن
........................................
اتكلها يختي النوم هيّن عالعيون
لاجن اتشل حالي من تلفي الظنون
هـا يجوني وهـا اظنهم ما يجـون
وبين هاي وهاي احس كلبي انسحن
-----------------------------
سكنه هلّت مدمع وكامت تنوح
اتكلها مو جرحج انه البيه الجروح
يختي اجيت اليوم بس ابلايه روح
روحي يم حسين اجيتج بس بدن
--------------------------
اتكلها ريت اوياج يا خيتي بقيت
ولا المذبح والدي ابجدمي مشيت
ريت أنه ابعلتج عليله وما شفيت
ولا مصايب كربله اعليه سدن
-------------------------
اتكلها بفراك الابو عشتي ابقهر
وآنه رحت اوياه بس شفت الامر
شفته محزوز الوريد امن الظَهر
والشفاه امن العطش يتفطرن
-----------------------
اتكلها عشتي ابوحشه ادري وعشتي خوف
رأف بيج الباري ما شفتي الطفوف
شلون لو شفتي الكمر يمه الجفوف
امكطعه وعالشاطي انواره انطفن
--------------------------
عالطفل عبد الله ادمنّتي الدمع
وآنه جنت اوياه بس ابيا وضع
ابلوعة اضماه و وريده المنكطع
امغسل ابدمه وتراب اصبح جفن
------------------------
و آه يا لوعة علي وعرس الشباب
ظلوا ابلا روس صرعه اعله التراب
لو وديعة فاطمه وداحيّ الباب
طــاح كافلها وتـكـفـلـت بالظعن
------------------------
وحده تشكي الوحده ويطول الشرح
والحديث الدار حول المنذبح
بالدموع وبالمصاب وبالجرح
اصبحن دستور للهم والحزن
-----------------------
ليست هناك تعليقات:
إرسال تعليق