الأحد، 30 ديسمبر 2012

بحزن وبآ * دفنته هنا __كريم فليح



بحزن وبآ * دفنته هنا * أبوي حسين أبو اليمه
تسألينــي * وتذكريني * بهذا اليوم يا عمـــــــه
ــــــــــــــــــــ
أجيت وشفت أبـوي حسين * ملتمــه عَلَيِّــه الــنــاس
واحــد يســأل الـثـانـــــــي * هـذا حسيـن لـو عبا س
حـﮕهم مــا دَروا منهــــــو * جثه أنفصلت امنالـراس
نـاس تـﮕول أبـو اليمــــــه * ناس تـﮕول أبو النوماس
جره دمعي * على خــدي * بهــذا اليـــوم يــاعمــــه
ــــــــــــــــــــ
يــــوم الشفـــت المثلـــث * طلع ياعمه من ظهــره
مـن ﭼَبّدت إبـوي حسيـن * طلعـت بـالسهـــم وذره
وحِّضرَت دفنتــه ويــاي * امـه فـاطمــه الـزهـــره
أحس العرش الهه إهتـز * من تبـﭼـي وتجر حسـره
وتواسينــي * عمت عيني * بهـذا اليــوم يـا عمـــــه
ــــــــــــــــــــ
يعمـه ومـن شفـت أيـده * على الخد نزلت الدمعـه
عـدوه بـلا رحـم عمــه * على الخاتم ﮔطع صبعه
مَحَـد يــﮔدر إبصـــــده * ولحَـــد يــﮔدر يمنعـــــه
أدور إعله الصبع محتار * عـﮔبي منهــو ليـرجعــه
بحزن نوحي * صفَت روحي * بهـذا اليــوم يــا عمــــه
ـــــــــــــــــــ
يعمــه بلحــده نَـزَلتـه * لـﭼني شلون نزلتـــــه
ضلوعه مهشمه كلهه * من خيـل الـي داستــه
يعمـه ولـن يحاﭼينـي * من نحره الحـﭼي سمعته
يـﮔلي بهيده يوليـــدي * ﮔلتلــه حاضر وبستــه
حـﭼيت ويـا * فــلا إنســا * بهـذا اليوم يا عمـــــه
ــــــــــــــــــــ
يعمـه ومـن تسـألينـي * الرضيع أبيـا كتر ﮔبره
دفنته بحضن ابن امـﭻ * وأحس ﮔلبي نفذ صبره
من شفت السهم نازل * يـا عمـه وذبـح نحــره
ﮔلبي شـﮔد تحَمَل ضيم * لاﭼـن ذاب هـالمــــره
سهم فرﮔا أظــن وَدّا * بهذا اليـوم يـا عمـــــه
ــــــــــــــــــــ
يعمه وﮔبر الاكبر هاذ * يَـم إجـدام أبوي حسيـن
شلتـه وبيـدي نزلتـه * وغسلته بـدمـوع العيـن
يعمه ومن شفت راسه * بالسيـف أنطبـر نصيـن
وهاي الطبره يا عمه * مثل طبرت أبو الحسنين
مثل حيـدر * شفت لاكبر * بهــذا اليـوم يـاعمــــــه
ــــــــــــــــــــ
يوم الشفت أبو فاضل * وحيد أعل النهر مطروح
أخذت الدرب ياعمـه * منبوي العمي دمع ونـوح
وأحس بجدامي ياعمه * ثجيله ومـا بـﮔـه كـل روح
ولا ﮔلب البعد يحمل * هواي بـﮔلبي صار جروح
ﭼفيل الطف * بـﮔـه بلا ﭼف* بهـذا اليـوم يـاعمــــــــه
ــــــــــــــــــــ
ﭼفوف الكرم والطيبه * يـا وسفـه غـدن طشــــار
ﭼفوف الـذي قبلهـن * ﭼـم مـره علـي الــــكرار
بعد ما ضل أثر الهن * عليهــن دَوَرت أمـــــرار
أثاري الزهر ضَمتهن * تـريـد الـثـار يــوم الـثـار
وِفه يا ناس * لـُـم عباس * بهـذا اليـوم يــــا عمـــــه

ليست هناك تعليقات:

إرسال تعليق