نفسه السلب خدري رايد هدم كبري
يزعل لون يدري عباس ابو الغيرة
***
زينب العودها الاخو يسمع عتبها
مايوم عباس الشهم رجع طلبها
رد ليها بسياط الحقد نفس الظربها
وكبالها اليبغض علي يوكف يسبها
اختك يكافلها رادتك توصلها
غيرك بعد شلها من توكع بحيرة
**
صاحت يكافل هيبتي ريتك شفتني
خوية الاثر من كربلا بعدة على متني
نفس الوجه المغبرة بالخيل اجتني
جمعت شما عدهه ظلم خوية اعتنتني
وصلتك زواري تحجيلك اخباري
يابالفضل داري يردون تفجيرة
**
اهل السقيفة الهاجموا دار الزجيه
بناروالشر والبغض هجموا عليه
والحارب بحرب الجمل حامي الحيه
ليه رجع وبغير اسم جيش ال اميه
ناس التعادينه تتآمر علينه
كلمن يوالينه يردون تغيره
**
سيف الاشرار بكل زن رايد ذبحنه
والسبب نرفن للظل هيهات صحنه
للجد اعلة من النجم لمن صبحنه
كل غايته يزيد العصر يهدم صرحنه
شيخ الوهابيه خط ابن تيميه
منهج بني ميه
**
عترة رسول الرحمة نور الهدايه
طول الزن ندفع ثمن حق الولايه
من عدنا ياناس شكثر راحت ضحاية
وغير العله كيود الهزل راحت سبايه
ذاك انكط عنحرة هذا انهشم صدرة
بنت فاطمة الزهرة كل يوم اطب ديرة
**
ياناس لو كلبي جبل هدمته الحسرة
بالطشت راس ابن الوصي وبعيني انظرة
بالخيزران الطاغية يضرب بثغرة
ثغرة اليقبله المصطفى وليشفي صدرة
كل كصده يهضمني من راد يشتمني
موقف يألمني يجرحني تصويرة
**
لو جان يجمعها الهدف هالجعفريه
تنسى الخلاف وتجتمع كلها سويه
وتحاسب الطاغي الكسر ضلع الزجيه
ياشيعة لازالت ترة زينب سبيه
زينب تعرفوني اطلب تحاموني
اجر اليزوروني عند الله تقديرة
***
لو جان يجمعها الهدف هالجعفريه
تنسى الخلاف وتجتمع كلها سويه
وتحاسب الطاغي الكسر ضلع الزجيه
ياشيعة لازالت ترة زينب سبيه
زينب تعرفوني اطلب تحاموني
اجر اليزوروني عند الله تقديرة
***
ليست هناك تعليقات:
إرسال تعليق