سبي زينب مره اخرى من قبل النواصب وعودتها الى كربلاء __حيدر تركي الكربلائي

مليــت .. مـن الغربه وحــدي ** رديـت .. خويه الگبرك احدي
اخـلافــك عــذبوني
وسبي ثاني سـبوني
ــــــــــــــــــــــــــــــــــــــــــــــــــ ـــــــــــــ
يوم اربعينك من بده وصارت الناس اتهاجر
زينب على افراگك بعد مابيـهه والله اتصابر
بالشام ما ا گــدر اظل ياخـــويه انه البــاچر
ارد اعتنـــيلك واشتــكي مـن العـــليه صاير
يحسين .. من اوصل الگبرك ** هالعــين .. هــيه الي تخـبرك
ابگبري وحاربوني
وسبي ثاني سـبوني
ــــــــــــــــــــــــــــــــــــــــــــــــــ ـــــــــــــ
ويَـــه المـــلايين الاجـــت جيـــتك انـه مشـــايه
آلام بيـــه امــن الســـبي يالوالـــي والله هــوايه
مــــن الجرالي يالاخـــو تيـــهت عقــلي ورايه
احچيلك اشسوه الشمـر وشصنع سوطه اويايه
بالشام .. رَد خويه وظــربني ** الآلام .. مرسومه اعله متني
ونفـــس السلبوني
سبي ثاني سـبوني
ــــــــــــــــــــــــــــــــــــــــــــــــــ ـــــــــــــ
اليوم ارد اخبرك يالاخو واشرح الك اخباري
ايهددني خصمك يالاخو رايـــد ايهـــدم داري
ماتنطفي وسط اللگـــب مستعره ظلـت ناري
إتصورك عـندك علم خــويه امنَــعو زواري
الزوار .. چانت تعتنيـلي ** الاشرار .. عنهم مانعيني
ابحــقدهم غيـــبوني
وسبي ثاني سـبوني
ــــــــــــــــــــــــــــــــــــــــــــــــــ ـــــــــــــ
مو سهل ياخويه الحصل والجره اهواي اعليه
دلالي گـــلي اشيحتــمل آهــات كــثره الـــبيه
اتـــذكرت بيـــدي يالاخو ودَت ســـلام ارقيه
هم مثلي ظلت بالغـــرب عــند العده مـسبيه
ويــــاي .. ماجـبتــــهه آنــي ** دعواي .. خاف اتموت ثاني
بيــــهه آلـــمــــوني
وسبي ثاني سـبوني
ــــــــــــــــــــــــــــــــــــــــــــــــــ ـــــــــــــ
من سوطهم خويه غدت سوده تراهه امتوني
احچيلك وگبل الحچي انظر ادموع اعــيوني
ما كفه كل ذاك الظـــرب ردو بعد ظربوني
ابــكل اسلحتــهم يالاخو غايتـــهم ايهـــدوني
بآهات .. قـــبتي والمناره ** ابدمعات .. يتــــباچن حياره
بيهـــــن هــــددوني
وسبي ثاني سـبوني
ــــــــــــــــــــــــــــــــــــــــــــــــــ ـــــــــــــ
جيتك انه ابوجهي الحزن خويه رســـم أثاره
من السبي يـــحسين اجت اختك الك محتاره
احچيلك اشصار وجره عن الدرب واسفاره
دلالي لـَـسه ماطفت مستــعره لـــجلك ناره
الاهوال .. ما انساهه انه ** الــدلال .. متهدم كــيانه
ابمصابك ذكــروني
وسبي ثاني سـبوني
ــــــــــــــــــــــــــــــــــــــــــــــــــ ـــــــــــــ
تمت والحمد لله في 22\12\2012
خادم الحسين حيدر تركي الكربلائي