امشي يلناگـــــــــه == روحي مشتاگــــه
ماتفجعچ حالتـــــي == طولت عن اخوتي
امشي يلناگـــــــه
----------------
وديني لحباب الگلب يلناگـــــــه ودينـــــي
مشتاگه وتمنه شكثر ليهم تصد عينـــــــي
جرح المتن ينزف تره وتدرين ياذينـــــي
بلچن من اوصل كافلي يگعد يداوينــــــي
مايدري بغيابـــــه == ظل ينزف اصوابه
حگي اصيح بدمعتي == طولت عن اخوتــــي
امشي يلناگـــــــه
-----------------
اخذيني يلناگه بعجل لگـبور وليانــــــــــي
مشتاگ گلبي وعل الصبر مايگــدر ايتاني
ارد اگصد الصوب النهر بدموعي وحزاني
وصرخ يعباس الدهر چم لوعه راوانــــي
من عگبه چتفوني == وللشام ودوني
وبگت تسعر جمرتي== طولت عن اخوتـــي
حنيت وبعيد الدرب وشكثر اتمنـــــــــه
يم كل گبر اگعد وون وترابه اشمنـــــه
تدرين يلناگه الدرب مگدر اوچدنـــــــه
وكل يوم تدرين بسنه ظليت اعدنــــــه
مشتاگ دلالي == وماينوصف حالي
ظلمه صارت دتنيتي == طولت عن اخوتـــي
امشي يلناگـــــــه
----------------
يوم الخذوني امچتفه يلناگه مسبيـــــــه
گالولي وصيتي الهزل بدموعچ عليــه
حنيتي وگلوب البشر ماحنت اشويــــه
ذبحوا اخوي من الگفه وماضاگ الميه
ظل يابس السانه == وبدمعه نادانــــــه
السهم صوب چبدتي== طولت عن اخوتــــــي
امشي يلناگـــــــه
---------------
ما خلت بعيني دمع لوعات فرگاهـــــــــــم
ياريت كون بكربلا دفنوني وياهـــــــــــــم
انه ادري ليهم من اصل وبدمعتي انخاهــم
ماظن يگعدون وبعد هيهات الگاهـــــــــــم
اتمنه اصل ليهم == اگعد وحاچيهـــــم
ويمهم اشكس حالتي == طولت عن اخوتي
امشي يلناگـــــــه
------------------
كل العيال الكربلا ويانه جبناهــــــــــــــه
بس طفله ماتت باليسر وهناك عفناهــــه
لوصد ابوهه عل الضعن وبدمعه ناداهـه
يلناگه اصيح بدمعتي ابنيتك دفناهــــــــه
وصتني بوصيه == وزاد الحزن بيه
راح اظل بغربتي == طولت عن اخوتي
امشي يلناگـــــــه
----------------
وصلي سلامي الوالدي يم الخدر صاحــت
وگليله عيني من الحزن ومن الدمع راحت
عل الراس لمن شافته بلهفه عليه طاحـــت
وعافتني للهم والحزن يلناگه ورتاحـــــــت
ولابد ارد ليهــــــا == وبدمعي اناديهـــا
وليها جريبه روحتي == طولت عن اخوتي
امشي يلناگـــــــه
----------------
مسلم محمد السماوي
ليست هناك تعليقات:
إرسال تعليق