صعب توديعك صعب_حيدر تركي الكربلائي

خويه يحسين ** حـط عيـنك ابـعيني
خويه يحسين ** عــد مـن تخليـني
صعب توديعك صعب
انـه عندي چـم گلب
-----------------------
ساعة اوداع الحبايب ماهي سهله
ينگطع لو غاب عـَنه الغالي وصله
وانتـه تدري بحال زينـب ماتحمله
خــل كلامك عــن وداعي لاتكمله

خويه يحسين ** تـدري الهـجر نــاره
خويه يحسين ** بظـلوعــي وجــاره
اعليه لو اصبح غصب
انــه عـندي چم گلب
-----------------------
اتريد عني اتروح وانه النوح ازيده
الحــره تـحتاج الاخو يمـها تـريده
خـويه زينـب تنـتطر رحله بعــيده
والله مايرضـيك انه امـشي وحيده

خويه يحسين ** احــتاجــك اويــايه
خوبه بحسين ** مـن امـشي لعدايه
گبل ما للشام اطب
انه عنـدي چم گلب
-----------------------
والــدي وصــاك بـيه وتــدري بــيه
امــودعه عندك يبــن حامي الحمـيه
شلون باچر ابقه وحدي اويه ال اميه
ريـت گبل امـوادعك تلــفي المـنيه

خويه يحسين ** هـاك اســتمع صوتي
خويه يحسين ** اتمــنيت انــه موتي
نار توديعك تـشب
انه عندي چم گلب
-----------------------
ابــد مو هيـَن الغـالي مــن نودعه
وهالوداع اعيوني سالت لجـله دمعه
ماكسـر صـوتي دلـيلك من تـسمعه
ذاب گلـبي من ودعاك چـنه شــمعه

خويه يحسين ** مــو روحي تدريها
خويه يحسبن ** مافكــرت بــــيها
راح للباري احتسب
انه عـندي چـم گلب
-----------------------
من تروح اتــظل تره زيـنب غريبه
وخدري يتسلب يسـموني السليبه
والمصيبه بالـسبي خـويه المصيبه
ابقه اصيح حسين ياهو الي يـجيبه

خويه يحسين ** ابقه انــه مـحتاره
خويه يحسين ** من امشي بسفاره
تقبل امشي اويه الغرب
انــه عــندي چــم گلب
-----------------------
خويه اخذ روحـي اذا رايد تهاجر
اويــاك للحومه اسـافر انه باچر
تـدري عالفرگه تره ما بيه اصابر
شلون باچر عالترب جسمك اناظر

خويه يحسين ** اسهامك اسهامي
خويه يحسين ** بعيوني يالظامي
ودمه من عيني اصب
انه عنــدي چـم گلب
-----------------------
تمت والحمد لله 10/8/ 2013
خادم الحسين حيدر تركي الكربلائي