اشعل العشرة شمع_حيدر تركي الكربلائي1435

لو تجيني .. انـه مـا ابچـي دمع ** لو تجيني .. اشعل العشره شمع
---------------------
من رحت خويه صفت روحي حزينه
وگلبي عندك وسـتمع انــته آنـينه
تجـي بالله امـن النـهر لو ماتجينه
اتنـاشد اطفالي يعـمه عـمنه وينه
لوتجيني .. اتشوفني وبيا وظع ** لو تجيني .. اشعل العشره شمع
---------------------
گلبي مـن فرگاك ياخويه تـگطع
رد عليه انچان صوتي انته تسمع
گلـي ياعباس يمـته بــالله ترجع
ردتك اتنشف اعيوني اعليك تدمع
لوتجيني .. خفت وصلك ينگطع ** لو تجيني .. اشعل العشره شمع
---------------------
الماي عوفه وعود ياخويه اليه
انــه مــا اتحـملك تبعـد عليه
وين عمي عمـه نادتني رقـيه
خـويه وتمـنيت تلفـيني المنيه
لوتجيني .. اذا صوتي ينسمع ** لو تجيني .. اشعل العشره شمع
---------------------
من رحت ياخويه گلبي الروحتك هام
واگـفه اتنطـرك انــه ابــاب الخيام
اشعر ابدلاي مرمي ابحـزمة اسهام
تـدري زينب بعد عـينك والله تنـظام
لوتجيني .. گـبل ما انه انفجع ** لو تجيني .. اشعل العشره شمع
---------------------
طولت يم النهر خويه اشـجرالك
خـوفي ياعـباس يتگـطع وصالك
اظن عاتـبت النهر واهـو حچالك
يعـتذر منك يبـو الغيره وبـچالك
لو تجيني .. الخيمتي اتدنه الجمع ** لو تجيني .. اشعل العشره شمع
---------------------
يـانـهر يمــك كـفيلي مـاتـرده
بـالله خـبرني اذا طـايح بــشده
الفـرگة الغالي ابــد مامستعده
ظعني هوه الجابه هوه الي يرده
لوتجيني .. اتشوف گلبي المنصدع ** لو تجيني .. اشعل العشره شمع
---------------------
خويه اظن صابوك خويه وصوبوني
وبسـهم عيـناك يالـكافـل رمـوني
وبالسـبي بعـدك تـراهم هددوني
ماتجـيني هـسه وتكحـل عـيوني
لو تجيني .. والله من نوحي امتنع ** لو تجيني .. اشعل العشره شمع
---------------------
تمت والحمد لله في 26/ 8/ 2013
خادم الحسين حيدر تركي الكربلائي