خاف تشاهد دمعك أمّه --- من رد إبنك يگطر دمّه
تموت بكتره ---- يبن الزهره
**********************
ما بين دمعات وحزن ----- خوية الدهر شيّبني
ومن فرگة أهلي بكربله - مني الظهر ضل محني
ما أحمل إمصاب وجرح --عگب المصايب ذنـّي
شمالك أخذت إلهالطفل--- صوب العده جاوبني
خوية خفت تگول اطفالي ----ذبحوهه العدوان اگبالي
مالي قـُدره---- يبن الزهره
*****************
يا زينب بدمعه يرد ------ هذا الامر مو بيدي
حين إگصدت صوب الخيم - ناداني نحر وليدي
سهم النوايب ينتظر----- يا بويه گطع وريدي
خذني يبوية للحرب ----- يوم الشهادة عيدي
خلـّي يشوف العالم كلـّه ----- للدين إشقدّم عبد الله
قدّم نحره ------ يبن الزهره
******************
أتحمّل آلام ومحن ------- وبيهه سگمني دهري
من صغري خلاهه الدهر-كثره الجروح بصدري
لاچن أصيح أم الطفل -- يشبه صبرهه لصبري
وتگدر تشوف إلهالطفل -- ومنه الدمايه تجري
هم تصبر أمّه گدامه ------- وتتحمّل جرحه وآلامه
ودمّه تنظره ---- يبن الزهرة
****************
يختي أخاف أم الطفل------ لو شافته تتجنـّن
وتگضي الحياة بلا عقل -- بالدمع والهم والون
وجروح نحره بكل وكت --- وياهه يبقن يحچن
تبقى الجروح بلا شفه ---- فوگ المصايب يغفن
يتسامر جرحه وياهه -------- بلا روح الليله خلاهه
تصيح بحسره ----- يبن الزهره
**************
نيران لا ما تنطفي ------ كل حين ضلت تسعر
بركان هز إلكربله -------- بحزن وأنين اتفجّر
ما ضل صبر عدهه بعد - وتگدر تشوف المنظر
مگطوع بسهام العده -- صارت تشوف المنحر
مدهوشه الليله تضل أمّه ---- حين تشاهد نحره ودمّه
وظهري تكسره ---- يبن الزهره
**************
اصغر فدائي قدّمت ----- يا خوية يوم طفوفك
وياه تحمل بالحرب -------- قرآن بين چفوفك
آيات گامت تنتفض ------ ترفض وحيد تعوفك
إحسبني سيف وبالحرب - مشهور وي سيوفك
سيف حسين إبنك من صرّح -- من دم نحره يكتب أصبح
آية نصره ------ يبن الزهره
**************
ليست هناك تعليقات:
إرسال تعليق