صعبه يحيدر صعبه_جبار البطاط

أنته الكلت يابا الحسن فـكد الحبايب غربه

ولي يعيش ابلا وطن صعبه يحيدر صعبه

غربه وصفيت ابلاوطن ... من ودعتهه أم الحسن

صعبه يحيدر صعبه

ــــــــــــــــــــــــــ

ياعلي فــــكد المحب غربه كلتهه
في دعــــائك سيدي انته اذكرتهه شكد طويله أيــام الفراك العشتهه
ايعينك الله الفاطمه شلون ادفنتهه
وشلون للدارارجـعت وحدك تنـــوح بعبره
وبالباب زينب شاهدت ضنهه ترد بالزهره
حسيت بهمومك بدن ... من ودعتهه أم الحسن

صعبه يحيدر صعبه

ـــــــــــــــــــــــــــــــــــ

هاي أول ليله ومشـــابك لحدهه
ومانشوفك ياعلي تحمل بُعدهه
تذكر السطره يكرار اعله خدهه
تكول راحت مني ياناس شيردهه
صافن على اتراب اللحد مثل اليتيم الليله
وانته علي ذاك الاســــــد ألمايرد ادخيله

من البجي اعيونك عمن .. من ودعتهه أم الحسن

صعبه يحيدر صعبه

ـــــــــــــــــــــــــــــــــــ

شلون راح اتكظي أيامك يحيدر

وانته موفاكد حبيب وتنسه تكدر

الراح منك لازمرد لاهــو جوهر

الكال عنهه الباري بالقران كوثر

جنة ألمأوى هيه الك من المصايب تشتد

فاطمه ومن تستقبلك كل نار كلبك تبرد

ماأنصف أوياك الزمن .. من ودعتهه أم الحسن

صعبه يحيدر صعبه

ـــــــــــــــ

انته صابر ياعلي وماشفنه مثلك

لاجن اتحزم ابصـــبرك لايخذلك

وين أمنه الليله زينب من تسئلك

والحسن وحسيـــن دمعتهم تكلك

يسئلونك ابفيض الدمع يابا الحسن وين أمنه

والصـــــوت منهم يرتفـــــع ياوالدي أتيتمنه

راحت لياليهه ومضن ... من ودعتهه أم الحسن

صعبه يحيدر صعبه

ــــــــــــــــــــــــــــــــــــــــــ

لاغمض جفنك ولاغمض جفنهم

عله النامت باللحد يبجون حكهم

ماتنـــــام اعيونهم يردون أمهم

وانته ابوالايتام وتحس بألمهم

تحضنهم ودمعك يهل ألهم تطــــيل النظره

تمنيت يبقى هالشمل حيف الزمان وغدره

فرقكم وحربه علن .. من ودعتهه ام الحسن

صعبه يحيدر صعبه

ــــــــــــــــــــــــــــــــــــــــ

النبي اموصـــــــــيك لاتشهر فقارك

لهالسبب عصرو الزهره اباب دارك

والله حقك تستعر ماتطـــــــفه نارك

أله تـــــــــــاخذ ياعلي الكرار ثارك

لوبقى يوم امن الدهر ياعلي حقك يرجع

تدري الامام المنتظر غايب وعينه تدمع

هالليله وياك لأن ... من ودعتهه أم الحسن

صعبه يحيدر صعبه

ــــــــــــــــــــــــــــــــــــــــــ

جبار البطاط