مسلم من طاح_صالح الخفاجي

ون گلبي وناح --- مسلم من طاح

دهري ضدي --- وأبقى لوحدي --- مسلم من طاح

***************

شسولفلك يبويه يوم --- إجاني بدمعته عمّي

رسم بيهه على خدوده --- يبويه قصّتي ويتمي

فطر چبدي وعمى عيوني --- وزادت ونّتي وهمّي

رسم دمعة وكتب بيهه --- يتيمة مو حميدة أسمي

راسم أيتام --- عاشت بآلام

قصّة وتبدي --- وأبقى لوحدي --- مسلم من طاح

************

شسولفلك حزن گلبي --- لو جفني النزف من دم

لو رجلي البعد ما ظن --- إلي تحملني من الهم

شبعد بيّ بگه سالم --- وأبوي بغربة ما يسلم

حميدة آنه بصغر سنّي --- إنكتب يا بوية أتيتّم

بعيني مكتوب --- أفگد محبوب

ودمعي بخدّي --- وأبقى لوحدي --- مسلم من طاح

***************

شسولفلك بعد عينك --- يتيمة إشمثگل إمصابي

وبگت عيني تهل من دم --- ودمعتي صبغت إثيابي

لن حمرة ثيابي الناس --- تشوف وزادت عتابي

ظنّتهه ملابس عيد --- ويا فرحة التدگ بابي

عيد العالباب --- ردّيت إجواب

شيقبل ردّي --- وأبقى لوحدي --- مسلم من طاح

****************

شسولفلك إجانه العيد --- واشوف الوادم بفرحه

بس گلبي إنجسم نصّين ---وميداوي الزمن جرحه

تصبْح الوادم إتهنّي --- وألاگي بدمعتي لصبحه

صباح الهم صباح النوح --- الجرح ياعيد لتفتحه

گلبي المجروح --- عيّد بالنوح

جرحه بچبدي --- وأبقى لوحدي --- مسلم من طاح

*****************

شسولفلك على راسي --- عمّي يمسح بچفـّه

وأحس آنه بدليله يذوب --- حين الضم إلي بلهفه

وأحس نار الگلب تسعر --- وأدري ما أبد تطفه

وأدري كل جرح يشفه --- وجرح فرگاك ما يشفه

ما ظن ألگاك --- طوّل فرگاك

أبچي بفگدي --- وأبقى لوحدي --- مسلم من طاح

****************

طبع بالبت لون مسهه --- يبوية ضيم لو حسره

لبوهه تلتجي بلهفة --- وگلبهه الوالد يسرّه

وأنه گلبي يبوية صار --- بساعة فرگتك جمرة

منو اليطفي نيراني --- تضل للموت مستعره

ضلت نيران --- مثل البركان

وصلت حدّي --- وأبقى لوحدي --- مسلم من طاح

****************

يتيمة بلا ولي ضلّيت --- ودم دمعي بگه جاري

أضل وحدي عگب فرگاك --- يبويه أظلم علي داري

وأضل أدعي بسواد الليل --- وأنادي بدمعتي الباري

يرجّعلي أبوي اليوم --- ويطفي برجعتك ناري

وغصني المكسور --- يرجع مجبور

ذابل وردي --- وأبقى لوحدي --- مسلم من طاح

************