يمشارك الروح ياخويه ياخويه
عن عيني أتروح ياخويه ياخويه
آنه بعيـــــــوني شفت *** مرمي جبدك بالطشت
يمشارك الروح ** يمشارك الروح
*****
ممن يوم الولادة أوفتشت العينين ** نفس الروح صرنه أوحلت أبجسمين
غصنين النبوة أو عالأرض سبطين ** وعيون الزجية أتراقب الغصنين
من ننعد فرد بس بالحقيقة أثنين ** يعني الكَال شبر هم يكَول حسين
عشنه أبألذ عيش ياخويه ياخويه
عني رحت ليش ياخويه ياخويه
من فرط حزني صحت ** مرمي جبدك بالطشت
يمشارك الروح ** يمشارك الروح
*
*
تذكر جدي من يحملني ويحملك ** من نحري يشمني وبلفم أيقبلك
تنشده أمنه الزجيه أشتقصد ابفعلك**والباري أبعظمته يشهد أبعدلك
جرت مدمعها عينه أوظلت أتصدلك ** بالسم جاوباهه ينمرد جبدك
تتركني أوحيد ياخويه ياخويه
وأكَليبي ميهيد ياخويه ياخويه
وآنه بعيوني أنظرت ** مرمي جبدك بالطشت
يمشارك الروح ** يمشارك الروح
*
*
شاهدنه مآسي كثرة شاهدنه ** أنه وياك لمن ما رحل جدنه
أصحاب السقيفة أتحالفوا ضدنه ** وابكَيد الوصية أنكَاد والدنه
وأجفوف الدهر رادت تباعدنه ** ما يرضى يعيش ابراحة واحدنه
يرمينه بأسهام ياخويه ياخويه
بجفوف الأيام ياخويه ياخويه
آنه من عدهن صحت ** مرمي جبدك بالطشت
يمشارك الروح ** يمشارك الروح
*
*
تجرعنــــــه رزايا من الدهر كثرة ** أعظـــمهن علينه عصرة الزهره
توصينه الظلع ما نحجي عن كسره ** تخاف الوالي حيدر يسمع أبأمره
من الباب للمحراب للطبره ** آن هوياك عشنه أشكَد غصص مره
بيهن أواسيك ياخويه ياخويه
بمصابي أعزيك ياخويه ياخويه
وسفه من عندي رحت **مرمي جبدك بالطشت
يمشارك الروح ** يمشارك الروح
*
*
سهم فكَدك ابكَلبي يا خي أتعده ** حصن صبري وداعكك يالحسن هده
أجت ليك العقيلة ولها هالنشّده ** صــــــدكَـ بالسم يخويه غدرتك جعده
أبو محمد أظنه هل كَرب وعــده ** واظن هاي الســــــــموم أدكَطع أبجبده
ساورني الخوف ياخوية ياخوية
شو لونه مخطوف ياخوية ياخوية
وآنه ياخويه المحت ** مرمي جبدك بالطشت
يمشارك الروح ** يمشارك الروح
*
*
بفراكَك يخويه كَليبي أتحير ** أصبر زينب أختك لو أنه أتصبر
جني أسمع نبينه أبكَبره أستعبر ** وأمي من البقيع أتصيح ياشبر
أصد للكوفة وأنظر والدك حيدر ** مأتم للحزن سوالك أتصور
ياخويه الأملاك ياخويه ياخويه
ضجت أبفركَاك ياخويه ياخويه
أتودعك يامن صرت ** مرمي جبدك بالطشت
يمشارك الروح ** يمشارك الروح
*
*
مازن الشطري
ليست هناك تعليقات:
إرسال تعليق