تمـنـيـتك تجــينـي ** حلـم وتمـر عليه
الك مشتاگه عيني ** رقـيه انـي رقـيه
يمـته اتـشوفك الـعين
يــاوالـدي يحــسـين
حلم وتمر عليه
---------------------------------
والله مشتاگـتلك انـي هـوايه بـويه هـوايه
لـيش مـن سـافرت عـنك مـا اجـيت اويـايه
للسبـي ممـشه خـذوني ورجـلي امـچوايه
بـويه مـن حـرگ المخيم كـل جروحي هايه
صحت وينك تمنيت ** تجي اتركبني انته
من المشي اتأذيت ** وصوتي ماسمعته
وين انته چـنت وين
ياوالـدي يحــسين
حلم وتمر عليه
---------------------------------
انـته هـم شـفت ابحياتك للسبي اخـذو طفل
وانـه اخـذوني سـبيه ودمـعة اعـيوني تـهل
ايـدي مـجروحه يـبويه وعالجـرح شـدو حبل
ساعه اطيح وساعه اگوم وساعه يظربني نذل
تعبت امن المسافات ** مسـيرتنـه بعــيده
شفت بالرحله لوعات ** صحت والدي اريده
احنه ويــن ماشين
ياوالـدي يحــسين
حلم وتمر عليه
---------------------------------
ارد اسـولفلك مـصابي الـصار مـن نتـلاگه
غـفت عـيني بـويه لحـظه وانـه فـوگ الناگه
شفـتك وبس ردت اگـلك والله الـك مـشتاگه
الـسوط فززني وسـافه وحـلمي مـني باگه
خـوَله مـن ظـربني ** طحـت عالـگاع اني
زغيره مارحمني ** ومشه الحادي ونساني
ورجعو اهلي بعدين
ياوالـدي يحــسـين
حلم وتمر عليه
---------------------------------
سافرت گالولي انـته الـسفر شـنهو اسـبابه
اطـفال بالـشام انـشدوني طـال ابـوچ اغيابه
اغـيابـك المنـي يـبويـه ومـايطـيب اصــوابه
اتـذوب روحي لمـن اسـمع طـفل يـصرخ بابا
صحت وينك حبببي ** الجــيتك انـه اتاني
منو ايطفي لهيبي ** ابغيابك والله اعاني
شـبت بــيه نـارين
ياوالـدي يحــسين
حلم وتمر عليه
---------------------------------
انتظر شخصك يجيني ساعه ساعه احسب اله
مـن غـيابك والله اعـاني بـويه صرت امعلعه
صحت عمـه ويـن ابـويه اتگـلي ظـل بكربله
شلـون يـرضاها سبيـه امـشي وانه امدلـله
يجروني بالحبال ** والمدمع اسـيله
ما اتحمل اغلال ** سلاسلهم ثگيـله
الي شـدو الـيدين
ياوالـدي يحــسين
حلم وتمر عليه
---------------------------------
مـر عـليه بـويه مـره ولـو حـلم يـاربته
والله مـلــيت الحيـاة ومـوتي اتمــنيته
وبـرقيه بعـد عيـنك ياشـخـص وصــيته
الموت اهـون لي ولا جـمر اليتـم حسيته
واقع حتى اشوفك ** ما انطر احلامي
وانه الزم چفوفك ** انته ادره بهيامي
شوگي ابگد السنين
ياوالـدي يحــســين
حلم وتمر عليه
---------------------------------
تمت والحمد لله في 24/ 11/ 2014
خادم الحسين حيدر تركي الكربلائي
ليست هناك تعليقات:
إرسال تعليق