راحوا الاحبهم والقدر حجبهم
موطن الجراحات اصبحت عكبهم
صحت بالم وبلا قلم دمعي رسم صورهم
لمن يمر ليل الهجر يسعر جمر ذكرهم
****
جم غالي احسب يا دهر راح من ادية
اول شبابي وانتظر يوم المنية
ما مر على ابن ادم المر علية
كل المصايب تنجمع بالغاضرية
قصتي عجيبة والكلب تصيبة
من اشاهد الماي اذكر المصيبة
من ينذبح نحر الصبح ينزف جرح هجرهم
صحت بالم وبلا قلم دمعي رسم صورهم
****
سجل يتاريخ الالم قصة جراحي
انا العليل وعلتي كسرت جناحي
انا السجين بلا سجن ليلي وصباحي
ابقة انتظر يوم الاجل يطلق سراحي
لا تكلي انسه جن اشوفة هسه
شفت ابوية مطروح والشمر يرفسه
صوت الحرم عوفوا الخيم لمن هجم شمرهم
صحت بالم وبلا قلم دمعي رسم صورهم
****
ما يقدر يحمله الجبل صبر الصبرته
راس الابو فوك الرمح بعيوني شفته
اكبر مصيبة على الاخو تتسلب اخته
نادت امنعه يا علي بس ما منعته
انظر لوضعها والشمر صفعها
عمية عيني ياريت ولا شفت دمعها
كل علتي ومصيبتي يم عمتي نظرهم
صحت بالم وبلا قلم دمعي رسم صورهم
****
شفت الفواطم والحرم حركوا خيمهن
واحد سلب واحد نهب واحد شتمهن
وينك يبوفاضل صحت اتعنى يمهن
يا عمي بالسوط الشمر والله هضمهن
جم طفل انظرة سحكوا على صدرة
والي بالبراري من يجي يدورة
مسرع رحت وامشي وطحت وتتبعت اثرهم
صحت بالم وبلا قلم دمعي رسم صورهم
****
عبدالله شفته من العطش يتلوة جيده
جنه يكلي يا علي الماي اريده
كتله يخوية المشرعة عني بعيدة
تاليهه نبلت حرملة كطعت وريدة
كل طفل نظرته عاينت رقبته
انا اخوية مذبوح بلا دفن تركته
لو مر طفل دمعي يهل واذكر فعل غدرهم
صحت بالم وبلا قلم دمعي رسم صورهم
****
اصعب جرح جرح اليسر يصعب علينة
من واحد لواحد صفت مجتوفة ادينة
والي كطع نحرالاهل يحدي الضعينة
آه والف آه الزمن شسوة بينه
من دخلنة للشام هذي ام الالام
تغسلت رقية من دموع الايتام
عبرة وعبر خلي الدهر يذكر خبر اسرهم
صحت بالم وبلا قلم دمعي رسم صورهم
****
يابوية يالباقر اذا نعشي حملته
اذكر ابوية بكربلا واذكر صحبته
عالغبرة ظل بلا غسل عاري تركته
لمن قطع نحره الشمر هم ما حضرته
هالجمع حسبته والعشيرة وانت
بس ابوية يا ناس من حضر دفنته
راح العمر دمعة وصبر ما ينجبر كسرهم
صحت بالم وبلا قلم دمعي رسم صورهم
****
لو وسدتني باللحد جمع العشيرة
وجوا على الي جثته ظلت اسيرة
نايم يويلي على الثرة بحر الظهيرة
كل وصله مشمورة بكتر شلته بحصيرة
بوية عالشريعة صارت الفجيعة
جفوفه عمي عباس عالنهر كطيعة
ما ظل امل بعد الاهل من انجتل قمرهم
صحت بالم وبلا قلم دمعي رسم صورهم
****
ليست هناك تعليقات:
إرسال تعليق