مــا اعـتـب يعـباس .. ولاعنـدي شـكيه
اعـرف كلك احساس .. خـويه صد عـلـيه
راسك عالرمح عالي
وتخجل تنظر الحالي
اعرف كـلك احساس
---------------------------------------
يلي راسك عالرمح . خـويه رايح للـسبي ويانه
جروح گيدي النادتك . رايده وجـهك اشـوفه انه
ليش عينك عالارض . وليش خويه گَصتك عرگانه
والله ما اعتب بعد . اولا اگـلك بالـشمر أذانـه
افتح عينك وشوف .. الك حنت عيوني
اولاتنظر عالچفوف .. تراهم گيدوني
خاف اتشوف احبالي
وتخجل تنظر الحالي
اعرف كـلك احساس
---------------------------------------
عيني عالناگه وغفت . وبالحلم شميت ريحة رايه
هذا لن انته الگمر . اتگلي گومي الكربله ويايه
خـدرچ انه اتـكفله . اليـسره واليمنه الـچ حمايه
ولو عطشتي ابكربله . النهر لخيامچ اجيبه ومايه
والله اگطعت الانفاس .. ثـاري بحلم اني
فزيت وشفت راس .. صحت وين الجفاني
الناگه اعثرت بذيالي
وتخجل تنظر الحالي
اعرف كـلك احساس
---------------------------------------
انه اعرف ياگـمر . ليش ماتنظرلي خويه عيونك
الماي لعيالك وصل . وبعد عن الماي مـيلومونك
انته ماقصرت ابد . همه بس رادو تره ايشوفونك
والله ماعدهم طلب . اولاوصـيه خـويه ويوصونك
اتوصيهم تمنيت .. اذا عندك وصيه
اصبَر انه ظليت .. بسـكينه ورقيه
بـيه شـلون يالوالي
وتخجل تنظر الحالي
اعرف كـلك احساس
---------------------------------------
انـته للغيره الاصل . الهالـسبب خـجـلان تنظر ليه
طــلعتني امدلـله . وهـسه انه اويه العده مسبيه
ايدي مچتوفه بحبل . والشمر كل حيله يسحب بيه
اتذكرتهـا هـيبتي . مـن جبـتني الـكربله مـحميه
ابهودج غـيرتك جيتك .. يسـمونـي الامــيره
سبيه ابغيرك امشيت .. وصار اسمي الاسيره
وهذا راسك اگبالي
وتخجل تنظر الحالي
اعرف كـلك احساس
---------------------------------------
ليش خليت السهم . وسفه ماطلعته ظل ابعينك
حتى يحجب النظر . ياگمر مابـيني خويه وبينك
اتريد ماتنظر الي . صعبه من اعثر اصيحن وينك
من يگومني بعد . وانـته بالطف گـطعو چفينك
وعـيونك يكـفال .. امـشـي واوگع اني
شدو ايدي بحبال .. وصحت وين الحماني
شافو طولي وخيالي
وتخجل تنظر الحالي
اعرف كـلك احساس
---------------------------------------
آيسـت منــك بــعد . مــاترد اتــبددت احـــلامي
ابگلبي يالكافل جمر . والله خويه مثل جمر اخيامي
لـمه شـبو خيمتي . مــاشـفت بس نارهـم گـدامي
ماصحت يابالفضل . ادري بيك اعله الشـريعه دامي
والله شبـت النار .. وحـرگتـنه سويه
اطفيها امن لزغار .. تشب النوب بيه
وكون اتشوف اطفالي
وتخجل تنظر الحالي
اعرف كـلك احساس
---------------------------------------
تمت والحمد لله في 9/ 11 / 2014
حيدر تركي الكربلائي
ليست هناك تعليقات:
إرسال تعليق