يازهراء حيدر نادى === حيدر نادى يازهراء
ما تنشف دمعـــــات العين === شلون إتروحين إو تمشين
يازهراء حيدر نادى
ــــــــــــــــــــــــــــــــــــــــــــــــــ ـــــــــ
يابضعــــة محمــد مظلمــــــــه داري == من بعدﭺ نزف ﮔﻟبي إو علت ناري
يصبّر روحي أدعي الخالق البــــاري == نهـر دمعي على إمصاﺑﭻ يظل جاري
روحي إهموم حلت بيهـا === حلـّت بيها روحي إهمـــوم
ﮔلبي إينادي يم إحسيــــن === شلون إتروحين إو تمشين
يازهراء حيدر نادى
ــــــــــــــــــــــــ
سيفي يالوديعه إيعاتب إو زعلان == ينادينــــي يحيدر واﻠﮔلب ولهان
يحيدر ما شفت من نزلت الأحزان == يوم اﻠﮔوم عصروها إبحقد شيطان
نادى السيف صبري زال === صبري زال نادى السيف
يوم الحَل إﻋﻠﯾـــﭻ البيــــن === شلون إتروحين إو تمشين
يازهراء حيدر نادى
ــــــــــــــــــــــ
شلون العين تنسه صورﺘﭻ للدوم == بعد ﻋﻳﻧﭻ ملت ﮔلبي ﭼثيره إهموم
سهران إو جفاني ياوديعه النـــوم == أنظـُر زينب إعليها الرزايا إتحوم
واويلاه تندب زينب === تندب زينب واويلاه
وأنظـُر لدموع الحسنيين === شلون إتروحين إو تمشين
يازهراء حيدر نادى
ـــــــــــــــــــــ
والبيت اﻟﻓﮔـد نورﭺ يـُون وإينــــوح == يواسيني إبدمع جاري إو جـُرح مفتوح
ما أﮔدر أشوفه إبهل حزن مجروح == تظل ﺘﺑﭼـي عليه إو ما تهيد الروح
يامجروح جـُرحك جـُرحي === جـُرحك جـُرحي يامجروح
وأﺑﭼﻳك الحد موتي إيحيـن === شلون إتروحين إو تمشين
يازهراء حيدر نادى
ــــــــــــــــــــــــــ
يزهره روحي وأيـّامي إو حلم عمري == يريت اﻟﮔوم عصروا فاطمه صدري
يريت المنكسر ضلعي إو دمه يجري == يريت إوياﭺ أروح إو ينطفي جمري
ياربـّاه إسمع نوحي === إسمع نوحي ياربــّاه
ضجــّت أملاك الكونيين === شلون إتروحين إو تمشين
يازهراء حيدر نادى
ـــــــــــــــــــــــــــ
يا أم الحسن وإحسين عذريني == وصـّاني أبوﭺ الهادي تدريني
أصبر ما أشيل السيف ياعينــــــي == أحافظ عالرساله إو هذا من ديني
هذا الصار صـوّب ﮔلبي === صـوّب ﮔلبي هذا الصار
يانور الفارﮒ عينييـــن === شلون إتروحين إو تمشين
يازهراء حيدر نادى
ــــــــــــــــــــــــ
عن حالي يهادي الناس إسألهــــــا == إجـَت ليك الوديعه وإلحقد عــَلـْها
يطاها أمـّــتك زيف إو دجل حـَلـْها == وصيتك آنـــــي يامختار أحملــْها
ﺤﮔـي ضاع يابو القاسم === يابو القاسم ﺤﮔـي ضاع
نكروني إو عالشر ناوين === شلون إتروحين إو تمشين
يازهراء حيدر نادى
ــــــــــــــــــــــــــــــــــــــــــــــــــ ــــ
مع تحيات شاعر اهل البيت / جابر النجفي
إسمعوا القصيده على هذا الرابط
http://www.wlidk.net/dldknn34859.mp3.html
ليست هناك تعليقات:
إرسال تعليق