من اشوفك تبجي لوداعي تأذيني لخاطري امسح دموعك يا نظر عيني
اصبر ولا تنفجع دمعك اغلى من الضلع
***
يتاج الراس اترجاك ترحمني انكسارك هذا يا حيدر يألمني
تعاين عالضلع وتشوفه عذبني تغطيني على كيف تخاف تلجمني
واسمعك من توصي ولدك لا تكعدوها ولا تنامون على صدر امكم تلجموها
يا وتر مالك شفع دمعك اغلى من الضلع
***
الحسن ابنك ورث طبعك يباريني اذكر موقفه ويايه ويبجيني
صغير ومن اجه الظالم سطر عيني على اطراف الاصابع وقف يحميني
من طحت طاح الحسن يا حيدر عليه حتى بي ضرب السياط تطيح مو بية
اخذ منك هالطبع دمعك اغلى من الضلع
***
وابني حسين من يوم النظر وضعي انظر دمعة يتهامل قبل دمعي
اشوفه بكل صلاة يتوجه ويدعي الهي شافي ضلع امي واخذ ضلعي
هالطفل من يمي يوصل ينسى كل همه يكلي من عمري على عمرج يمة يا يمة
لايهمك هالوضع دمعك اغلى من الضلع
***
وزينب يا علي تهيجلي همومي تمنت يومها يقرب قبل يومي
انام وادري شتسوي بوكت نومي تروح لحجرتي وتقبل هدومي
والوضوئي لو قمت انظرها ما ترضه تجيب ماي وانا فوق فراشي اتوضى
كافي لا تجري الدمع دمعك اغلى من الضلع
***
لهذوله اطفالي ما اهتم لوّن يبجون سبع فدوات الك يابالحسن يرحون
علي انت علي دمعك يهل شلون وحقك عندي دمعك اغلى من الكون
والله مو سهلة عليه من اودعنك انا كون ابجي لغيابك لو رحت عنك
والسماوات السبع دمعك اغلى من الضلع
***
ليست هناك تعليقات:
إرسال تعليق