اني ابوفاضل واجيتج _ جابر النجفي1435

يـُمـّه يايـُمـّه -- جيتچ إبلهفه إو حزن
يـُمـّه يايـُمـّه -- رايد أحضر بالدفـــن
آني أبو فاضل وجيتچ === أحضر إبهمـّي منيتــــچ
يـُمـّه يايـُمـّه === يـُمـّه يايـُمـّه
ـــــــــــــــــــــــــــــــــــــــ
إجيتچ من أخوي إحسين وإبهمـّي == أنـــــــــادي يالعزيزه الطاهره يـَمّي
مصابچ يالوحيده للنظر يعمي == بلا چفين إجيتچ وإبنزف دمـّي
يـُمـّه يايـُمـّه -- فارگ الروح الصبـُر
يـُمـّه يايـُمـّه -- أحفـــــر اليوم الگبـُر
أسمع إو أفهم وصيتچ === أحضـــر إبهمي منيتچ
يـُمـّه يايـُمـّه === يـُمـّه يايـُمـّه
ــ
إجيتچ والعقيله إويـاي ياحـُرّه == إجيتچ والگلب مجروح وإبجمره
أعزي بيچ أمـّي فاطمه الزهــره == والحوراء مهمومه إو تصب عبره
يـُمـّه يايـُمـّه -- زينب الطيبه إجـَـــت
يـُمـّه يايـُمـّه -- ناحت إعليچ إو بچت
ريت بدموعي رويتچ === أحضر إبهمـّي منيتـــــــچ
يـُمـّه يايـُمـّه === يـُمـّه يايـُمـّه

ــ
إجيتچ من أبو اليمـّه الذبيح اليوم == من عنده رساله أحمل ملاها إهموم
كتبها إبعبرته التجري عليچ إدموم == وفيتـــي إيگول يا نعم الوفه الموسوم
يـُمـّه يايـُمـّه -- نورچ أبــداً ما خـِفـَه
يـُمـّه يايـُمـّه – صرتي للظامي شـِفـَه
ظلــّت إبهمها ثنيتچ === أحضر إبهمـّي منيتچ
يـُمـّه يايـُمـّه === يـُمـّه يايـُمـّه
ـــــ
إجيتچ وأحمــــــــل الآلام ياروحــــــي == أوفيچ إبهيامي إو دمعتي إو نوحي
إجيتچ تنزف الآهات بجروحي == يايـُمـّّه إبحنينچ رددّي إو بوحي
يـُمـّه يايـُمـّه – بالوفه صرتي المثل
يـُمـّه يايـُمـّه – من كرم خير العمل
من علي الحامي حميتچ === أحضر إبهمـّي منيتچ
يـُمـّه يايـُمـّه === يـُمـّه يايـُمـّه
ـــ
إجيتچ للمدينه إو كربله إتنــــــادي == إخذ ويـّاك دمعه التـُربة الهادي
أريد ألحگ عليچ إو شوفتــــــچ زادي == گبل ما يحدي بالروح إو يجي الحادي
يـُمـّه يايـُمـّه -- فارگيتني إبألـم
يـُمـّه يايـُمـّه – آني شيـّال العلم
وإبحنينـــــي فارگيتچ === إحضر إبهمـّي منيتچ
يـُمـّه يايـُمـّه === يـُمـّه يايـُمـّه
ـــ
إجيتچ والأمل يكبر يروح الروح == أحضنــــچ ياحبيبة گلبي بالنوح
يا أم البنين النازفــــــــه إجــــروح == سلام أنقل إلچ من الأخو المذبوح
يـُمـّه يايـُمـّه – ريت مـَيـْحـّل الأجل
يـُمـّه يايـُمـّه = شوفتچ عندي أمل
مـَيـّتـَه آني لگيتچ === أحضر إبهمـّي منيتچ
يـُمـّه يايـُمـّه === يـُمـّه يايـُمـّه
ــــــــــــــــــــــــــــــــ
مع تحيات شاعر أهل البيت / جابر النجفي
إسمعوا القصيده على هذا الرابط
http://www.wlidk.net/dldtkl20205.mp3.html