يبني يالكاظم لو خلص عمري
عند قبر فاطم احفره لقبري
اني جبدي بالسموم مفطرة وامي ضلعين بصدرها مكسرة
***********
انا ابن حيدر علي وطه نبينا وانا قطعه من جبد امي الحزينه
شيدت دور العلم برض المدينه ولو عصف موج الفتن جنت السفينه
لاجن اشباه البشر جارت علينه ومن ظلمهم هذا جبدي مكطعينه
ومن قبل لمه العمر تخلص سنينه يبني يالكاظم هتف قلبي بحنينه
تدري باحوالي و شالذي اتي يبني ايبني تسمع وصاتي
اني مرمي والمصاب اتصورة وامي ضلعين بصدرها مكسرة
*********
يبني يالكاظم بدت اول وصية من تحملون النعش كلكم سوية
لو سمعتوا بالدرب ونه خفية هذي ونة فاطمة تنوحن عليه
بالله عرج بالنعش صوب الزجية وقلها مات وليدج تسمه المنية
واحنه عند قبرج لفينه بهالمسية ندفنه وننصب على الوادي عزيه
وعن جرح جبدي يبني لا تحجي خايف الزهرة تنحب وتبجي
وتبقى نارين بالدليل موجرة وامي ضلعين بصدرها مكسرة
***********
يبني يبني بكشف اسرارٍ عجيبه وادري قلبك بالحزن زايد نحيبة
زمرة الي كسرت لصدر النجيبة وبالحبل قادت علي ليث الحريبة
قدمتلي بالحقد سم المصيبة وهذا جبدي من دمه صوابي خضيبة
صرت الوج من المرض مثل الحبيبة وتالي طحت على الثرة بحالة رهيبة
من عكب همي صرت احن يمي هذا دم صدرج يجري لو دمي
اني روحي من عذابي مكدرة وامي ضلعين بصدرها مكسرة
**********
يبني واسمع بالحزن ثالث وصايا والله يالكاظم لون يحصل على هواي
يبقه جسمي بلا دفن وتكصده عداي وتنسحك مثل السبط فوق الثرة عضاي
ورابع وصية صعب تسمعهه يضناي لاترش على القبر بعد الدفن ماي
من ترد داري وتصد جملة يتاماي اذكر سكينة ويتمها الذوب حشاي
واذكر لزينب كوة يسروها ولو بجت يبني بسوط يضربوها
هذا موقف وانا دوم اتذكره وامي ضلعين بصدرها مكسرة
*********
ليست هناك تعليقات:
إرسال تعليق