اذا شفت النعش رافع شراعه يبحر دموعي واسيني بوداعه
علي الليله يسافر بعد المن اكابر
راح ابويه راح ابويه
______
انا زينب انا بنت الذي راح مثل جرحه بدليلي تارك جراح
النعش من شفته وكبالي اليتم لاح صحت والكون كله يا علي صاح
الجماد عليه يبجي وذات الارواح مو عجبه اذا شفت العرش طاح
احس كلشي يعزيني بونينه البكه براسج يزينب يا حزينه
انا المكسورة خاطر بعد المن اكابر
__________
السمه بهاليله نزعت عنهه النجوم احترام لحزني سود الهدوم
وداع وروحي يم نعش الابو تحوم طبرتين بعيوني وفاضن دموم
ياصعب فاتحه واقراها بهموم الصراط المستقيم بنعشه هاليوم
اصيح ويختنك بالعبرة صوتي قبل موت الابو اتمنى موتي
خل تضمني المقابر بعد المن اكابر
_________
طلع نعش الولي ما اعرف شصار مجرد طلعته اظلمت الدار
جبت حيلي وركضت وحيلي منهار بثقل خطواتي اتعثر بالعبار
اصرخت يالبالنعش هاك اخذ الاخبار اشيعك للجنان ومهجتي بنار
يبويه وادري ميهون على قلبك حبيبة خاطرك تبجي وتندبك
منو بفكدك يصابر بعد المن اكابر
__________
الثواني سيوف كطعت حبل الامال و رجع مهر الصبر ما فوكه خيال
عسه عمري لمثل هاليله لا طال عجيبه الشال خيبر نعشه ينشال
البطل كون التشيله مثله ابطال الحسن وحسين جبريل ويه ميكال
علي وكون الذي يم كبره تنحب عقيله غالب التتسمى زينب
اهل دمع المحاجر بعد المن اكابر
__________
حزن فكد الوصي بعيون الافلاك اجت يم قبره تبجي ويايه الاملاك
صحت يالوالي لو تاخذني وياك صعب تدري اعيش بدنيا فركاك
بعدهه باذني ناعية الفجر ذاك انهدم ركن الهدى من فاضت دماك
يميت وانت حي بذكرياتي شلي بيها بعد عينك حياتي
اشوف الماضي حاضر بعد المن اكابر
____________
رحت عني وعفتني بدار المصاب مثل راسي الكلب من فركتك شاب
اذكرك يا علي ما اقصد عتاب قلتهه وتدري غربه فركة الاحباب
بعدني ما قمت من عصره الباب ارحم حالتي مو جرحي ما طاب
صرت بين الضلع والطبره دمعه مثل سعي الصفا والمروه اسعى
دليلي بهمه حاير بعد المن اكابر
______________
للاستماع اضغط هنا
ليست هناك تعليقات:
إرسال تعليق