اجيت وعنك ابحث وبالكلب جمرة
وين الكاك يمه والجثث كثرة
كالولي حبيبج منكطع نحرة
قلت راسة اكيد موسد بكترة
اجيت ابحث عليك ببين بحر الدم
لقيتك يا حبيبي موذر مخذم
كعدت يمك رفعت اصوات نوح وهم
وعلى جسمك نصبت بضيعتك ماتم
تكله ::
انوح عليك يبني واجرح احساسك
ليش اهل الغدر كتمولك انفاسك
صدك يبني اشوفن منقطع راسك
وصدك بالخيل فوكه اهل الغدر داست
____________________
هذا انت الذي بيك النبي وصه
عدوك ما نطاك من العمر فرصة
كل سلاب اخذ من الجسد حصه
حتى لخنصرك سيف العدو كصه
___________________
وينه اليبجي عل حسين والزهرة يعزيها
تراها كاعده وياكم وثوب حسين بيديها
__________________
يمة حسين انوح عليك وابجي لذبحت انصارك
وابجي لذبحت اولادك
يمة حسين يا مذبوح تسعر بالكلب نارك
انوح عليك يمة حسين يا مذبوح يا مظلوم
وابجي لطفلك اليرضع عطشان وتذبحه القوم
بدال الماي بالنبله يفطمه حرمله الميشوم
ورديته لعند امه مدري امه شيظل بيها
___________________
كل مأتم اطبن ليه اقعد طرف من الناس
وحدي ودمعتي تجري واصيحن والطم على الراس
اصيحن مرة يمه حسين ومرة اصيح يا عباس
ينور العين يا عباس جفوفك ليش كطعوهه
وضمايا اطفال اخوك حسين من الماتي حرمهه
زينب من عكب عينك يبو فاضل صدك للشام ودوها
عافتك جسد عاري كلبها شلون ينطيها
_______________________
يا يمه حضريني وبالطف تشوفيني
ريتج تحضريني يايمة يا يمة
حسين انذبح عطشان عاري على التربان
لا غسل لا اكفان يا يمه يا يمه
حرقوا خيامي الكوم وناديتج بهاليوم
عينيني عالمظلوم يا يمة يا يمة
حسين انكطع نحرة وهشموا اله صدرة
ناديتج بعبرة يايمة يا يمة
وين اتجه لا وين ومطروح اخويه حسين
حيرني يمة البين يا يمة يا يمة
يا يمة ضربوني ويا يمة شتموني
ويا يمة هضموني يايمة يايمة
يمة علي الاكبر بسيف العده مطبر
وجابوا الي موذر يا يمة يا يمة
والقاسم الذبحوا بفيض المه حنوا
مذبوح الي ردوا يا يمة يا يمة
______________________
للاستماع اضغط هنا
ليست هناك تعليقات:
إرسال تعليق