بأهات ودمع وهموم هالليله ** العقيله اتوجهت للباري تدعيله
ابوهه اتريده سالم
من ظــربة الظالم
ــــــــــــــــــــــــــــــــــــــــــــــــــ ــــــــــ
هتف ناعي المصاب ودگت اجراسه
والكـون اخــتلف هالليـــله مقيـــاسه
ابن ملجم طبر حيدر علــي ابـراسه
وعليه ظجت بچي من الحزن ناسه
ابنه المجـــتبى للـــدار من جـــابه ** زينب شافته وصاحت منو الصابه
الجبينه السيف هاشم
مـــن ظــربة الظالم
ــــــــــــــــــــــــــــــــــــــــــــــــــ ــــــــــ
لمن شافت ابوهه ابهـامته الطبره
عرفت حالته مـو سهله لا خطره
شالت ايدهـه تدعــي وبـدت تقره
يا كاشف الظر سهل ابـويه امره
اريده ايگــــوم سـالم ليـــه ياربي ** وتعرف حاجتي بس انته البگلبي
الهي ابحالي عالم
من ظــربة الظالم
ــــــــــــــــــــــــــــــــــــــــــــــــــ ــــــــــ
تصد ساعه اعله چفه وساع ليتامه
وتـــــتذكر ابــــوهه محـــله ايامه
من يمــسح عليهه مثــــل ايتــامه
هموم البيهه كلهه ابلحظه تترامه
تگله يالابو گوم امـــسح الراسي ** يمن چفك مسح فگد امي القاسي
زماني احزان راسم
مـــن ظــربة الظالم
ــــــــــــــــــــــــــــــــــــــــــــــــــ ــــــــــ
تگله يالابو گــوم انـظر الـحالي
بقـــه بس الدمع والنوح يبـرالي
اذا ناوي الرحيل ارحـم ابدلالي
لاتتــركني وحدي بالله يالــغالي
منك ما اريد انه ابقه محرومه ** يكفيني فگــد فاطمه المظلومه
اليتم بيه تدري يالم
مــن ظــربة الظالم
ــــــــــــــــــــــــــــــــــــــــــــــــــ ــــــــــ
حــط عينــك ابعيني ولاتغمضهه
ولتخــلي دمــع فرگــاك يحرگهه
عيوني للثواني اتريــد تسبــگهه
گبل ما هالمنايه النظره تسرگهه
اريد اشبع نظر من وجهك ونوره ** قبل ماتختفي عن عيني هالصوره
ردتك ليـــه غـانم
من ظــربة الظالم
ــــــــــــــــــــــــــــــــــــــــــــــــــ ــــــــــ
تگله الموت واجب وادري بسـبابه
ولابد كل بشر بيه يتــرك امصابه
اخذ من عندي جدي وامي لغيـابه
ويردك مني انــته النـوب يايــابه
اشگد اعيونه صلفه ومارحم بيه ** هاي بگــلبي لـــسه كل بـلاويه
إله اويايه مواسم
من ظــربة الظالم
ــــــــــــــــــــــــــــــــــــــــــــــــــ ــــــــــ
تمت والحمد لله في 1\8\2012
خادماهل البيت \ حيدر تركي الكربلائي
ليست هناك تعليقات:
إرسال تعليق