بدموع الحِزن يــــا جعفريه
نذكر فاجعه ولوعـه ورزيه
نور العسكـري غاب
بسامَـرّه الگلـُب ذاب
بدموع الحِزن يــــا جعفريه
1
يا رسول الله إلك نرفــــع عزانه
بشوغة الگلب الكئيب وعنفوانه
ندري بدموع الحزن عدنه أمانه
لعترتــك نجريهــا ونبيّــن أسانه
مضمون الدمع يشرحلك الحال
والحسرات مصدرهــــن الدلاّل
والَصَب دمعه ماخاب
بسامَـرّه الگلـُب ذاب
بدموع الحِزن يــــا جعفريه
2
بينك وبيـن الدهــــر ياطـــه يا ثار
حتى بگلـوب التِحِبـَّــك يشعل النار
بدت تشريع الفجايع گــوم الاشرار
بدت من يوم الحصار الصار عالدار
بيوم الطاحت الزهرة الزچيه
ابابك والحطـــــب والناصبيه
فتحَو للوجَــــــع باب
بسامَـرّه الگلـُب ذاب
بدموع الحِزن يــــا جعفريه
3
من هذاك اليــوم يـــــــا طه النوايب
صبّت أعلـــه الآل شَــــلاّل المصايب
وشيفيد اعتــاب لــــو دهــرك نِعاتب
والدهر نفس الدهـــــر للدمعه راغب
مِن سَلـّط طـُغاته اعله الرعيه
صاب العسكري بهاي المسيه
نبّت بالچبـــــــد ناب
بسامَـرّه الگلـُب ذاب
بدموع الحِزن يــــا جعفريه
4
وحده وبعيد الــدرب عن دار جده
ليل كل ساعــات عمـره الي تِعـدّه
ماكو شيعة اليستنـد ليهـا وتِسِنده
والغريب المنسجـن شتلاگي عنده
ماغير الدُعاء ابظلمة الليل
خاطِر منكسِر ومهَدَّم الحيل
ضايع بيــــن أغراب
بسامَـرّه الگلـُب ذاب
بدموع الحِزن يــــا جعفريه
5
شاب مـــــا كمَّــــل ثلاثين ابحياته
يهدي كــل النـــاس چانـت أمنياته
والعجب نـاس الذي تعرف صفاته
راد يهديهــا لچــــــن رادت مماته
گوم المِنهُم التوفيـــــق معدوم
فجعَوا شيعته بالعسكري اليوم
راسه أمن القهر شاب
بسامَـرّه الگلـُـــب ذاب
بدموع الحِزن يــــا جعفريه
ليست هناك تعليقات:
إرسال تعليق