أم الحـُسين إتنادي === ظلموني بويه الهادي
ـــــــــــــــــــ
يابويه من بعدك غدت أيـّامي
ظلمه إو علاه الضيم گلبي الظامي
ما أنصفوا حيدر علينه الحامي
وأصبح أبو الحسنيين حاير دامي
نكروا ولينه الفادي === ظلموني بويه الهادي
ــ
نار السقيفه يانبي تچويني
إلـْمـَن أروح إو أشتكي دلـّيني
جور إو غدر أجرى مدامع عيني
كل ناصبي إو فاجر شــَرَر يرميني
صارت دموعي زادي === ظلموني بويه الهادي
ــ
ضلعي إنكسر من دفعة العدواني
بسمار صـَوّبلي الصدر وآذاني
مـُحسن وگع بويه إبألم ناداني
يــُمـّه الفعل هذا إبغدر شيطاني
شافوا دموع إولادي === ظلموني بويه الهادي
ــ
آني على إفراش المنيـّه إبــْهمـّي
والمرتضه تجري دموعه يمــّي
شوفة بنيني بالمصيبه تعمي
زينب يبويه الزوّدَت من غمـّي
صوت المنيـّه شادي === ظلموني بويه الهادي
ـــــ
ماريد ياحيدر علي الظلموني
يمشون بجنازتي وإيشيلوني
وإخفي الگبر يالمرتضه يعيوني
ماريد ذوله الناصبه إيزوروني
منعوني نيل إمرادي === ظلموني بويه الهادي
ــ
عينك على زينب أريدك حيدر
ماريد بنتي العالمه تــِتـْحسـّر
زينب زغيره إو خايفه تــِتـْكدّر
أدري الحزن يلفيها يوم إو يكثر
يوم اليصيح الحادي === ظلموني بويه الهادي
ــ
لازم يجي يوم إو تهل أنواره
إبني اليطالب بالقصاص إو ثاره
يشهر أبو صالح غدن بتــّاره
يبني دولته إو شيعتي أنصاره
وإتهل عليــّه أعيادي === ظلموني بويه الهادي
ـــ
ياشيعتي آني الشفيعه أحضر
ويـّاكم إبأهوال يوم المحشر
يسگيكم إبأيده وليكم حيدر
شربه إو بعد ماكو عطش يتكرّر
إلكم يحل ميعادي === ظلموني بويه الهادي
ـــــــــــــــــــــــــــ
مع تحيات شاعر اهل البيت / جابر النجفي
إسمعوا القصيده لى هذا الرابط
ليست هناك تعليقات:
إرسال تعليق