باجر لو تشوفيني _محمد حجيرات 1435

باجر لو تشوفيني يزينب ما تعرفيني
------------
يودعها تهل عينة ويكلها الامر حتمي
هسه كاعد كبالج باجر عالارض مرمي
لو شفتيني عالغبرة زينب لا تجي يمي
مطبر بالحجر راسي شيبي مخضب بدمي
اذا باجر تلاكيني يزينب ما تعرفيني
------------
باجر آه يا زينب وكل الاه من باجر
وجهي هذا وجه الله يبقى على الارض حافر
لو شفتيني بالمصرع دلالج يظل حاير
كل اوصالي تتقطع بين السيف والحافر
اذا مقطوعة جفيني يزينب ما تعرفيني
-----------
بالميدان يا زينب باجر ينخسف بدري
اذا ودج تقبليني هسه قبلي نحري
انشدج يختي حاجيني سؤال يراوح بفكري
شتسوين اذا شفتي الشمر قاعد على صدري
تجي ولمن تنظريني يزينب ما تعرفيني
-----------
باجر لو وكع جسمي والاسياف وذرنه
راسي على الرمح يبقة اظن عندج خبر عنه
اذا يم الجسد جيتي تاخذ قلبج الونه
شلون تعرفي اوصافي والطعنة على الطعنه
اذا جيتي تحاجيني يزينب ما تعرفيني
-----------
اودعج والوعد وياج  يصير بساحة المصرع
اذا رد المهر خالي ينوح ويهمل المدمع
تعالي ولا تجيبي وياج سكنه خوفي تتلوع
شيصبرها لو شافت ابوها على الثرة موزع
اذا ودج تواسيني يزينب ما تعرفيني
-----------
للاستماع اضغط هنا
https://www.youtube.com/watch?v=sKrFr9Ic6H0