-فوگ الجسر يوليدي_صالح الخفاجي

راح الامل من ايدي ----فوگ الجسر يوليدي

والـدمـع مـنـّي سـچّـاب --- امصاب ما مثله امصاب

فوگ الجسر يوليدي

*********************

عـالـجـسـر حـرمـة تـنـادي بـصوت اشـجـان ومآسي

أنجرح وجروحي كبرت وكل جرح من دهري قاسي

مـا يحملـه الـكون جـرحـي وزلـزل اجـبـال الـرواسي

مْن الباب وي كسر الضلع –وبـالـطـف دليلـي منفجع

چـم جـرح دم هـل الـدمـع ---وشاب من دنياي راسي

وجروحي من يشفيهه ---يا طيبه تحصل ليهه

من كربله ومن الباب ---امصاب ما مثله مصاب

فوگ الجسر يوليدي

************************

آنـه يـالـكاظم تـرانـي امـّك الـزهـرة الـزچـيـه

إنفتح جرحـي بـمصابـك وردّت جروحي عليّه

اذكرت باب العصرني وطيحت ابني عالوطيه

وانعاب صدري من الدهر –وبسمار لضلوعي كسر

وردّت على بالـي الصور –مْـن الـجـسـر للغاضريه

ظلـّام ما رحموني ---بمصابك يهظموني

وصدري بمصابك ينعاب –امصاب ما مثله مصاب

فوگ الجسر يوليدي

***********************

عالجسد ضليت اعاين عالجسر مرمي بجروحه

صدّعت گلبي المناظر ومـا سـكـن للـيـوم نوحه

لن خيالـي راح للـطـف يرسم إلأحـزانـي لـوحه

بالطف رسم صورة جسد –بالحر يضل وسط الشدد

وگـلـبـي الـيـفـيّـيله ارتعد – خاف حر شمس التلوحه

ضل الجسد عالغبره ---مطروح چبد الزهرة

ومن سحگت الخيل انصاب –امصاب ما مثله مصاب

فوگ الجسر يوليدي

**************************

ومن شفت واحد يگلـّب جسمك من اهل البصيره

وصـاح هـالـمـيـّت يـوادم مـا إلـه اهـل وعـشـيره

راح يـم حسين فكري بـغـربـتـه مـن عـز نصيره

من ضل وحيد بكربله ---عطشان ابن عقد الوله

ما ضل أخ وصاحب إله –وعالجثث طرفه يديره

راحت اخوته الليله --- ضلت جثث توميله

ويسمع جواب الاصحاب –مصاب ما مثله مصاب

فوگ الجسر يوليدي

***********************

ينحني يوليدي ضلعي وينفطر چبدي بحسرته

مـن اشـاهـد قـيـد بيدك تگطع الـمعصم شفرته

ذوّبت للـگـلـب نـاره ومـا طفت يبنـي جمرتـه

أذكـر عـلـيـل الـعـايـله –ورده بـحـزنـهـه ذابـله

ضلت دمـاءه سـايـلـه –من قيوده ومن دمعته

يجري الدمه من ايده ---مْن الجامعه ومن قيده

والجسم من قيده ذاب –مصاب ما مثله مصاب

فوگ الجسر يوليدي

*********************

وين هاشم خل تجيني عالجسر تلگيني يمّك

أنحب وابچي واعاين للسواد الغطـّه جسمك

بيا ذنب هارون يامر بالسجن يوليدي سمـّك

ونـشـوف گلبك ممتحن ---ومفطور من سم وحزن

هم سم والم ظلمه وسجن ---هم غياب اهلك يألمك

چبدك تصدّع يبني ---بسم الحسن ذكرني

بالسم يلوج ومنصاب ---مصاب ما مثله مصاب

فوگ الجسر يوليدي

*************************

اتجمّعت بيك المصايب وهيّج مصابك جمرهه

غربة حسين ونضاله ودمعة الكبرى وصبرهه

والحسن بالسم يموسى اتگطـّعت چبده وفطرهه

تگضي العمر يبني بسجن

صابر گضيته ومـمـتـحـن

مـهـمـوم ضـلـّيـت وتــون

وعالجسر مسموم يبني جثـّتك ضلت رميه

*******************