من واعدتنه سيدي بوعدك وفينه
فوگ الجسر نترقبك كلــنه اجينه
مشتاگين الشوفتك ***** محتاجين اليمنـتك
تمسح علينه
ــــــــــــــــــــــــــــــــــــــــــــــــــ ــــــــــــ
اعلينه طولت الهــجر .. تمر نــدري ما تمر
بيـــش نتحله يغالي ومـــا بـــقه عدنـــه صبر
اسمعنه من عندك آمر .. گلت تانو عالجسر
الفرج ياشيعه قريــب وكل عــسر بعده يسر
شكم محب ناذر نذر .. وليــك واگف منتظر
نار شوگــك يبن جعفر شبـــت احبابك جمـر
تدري عطاشه الشوفتك كل هالحبايب
إرويهه انته بطـــلعتك يبن الاطــايب
منتظرين الجيتك ***** محتاجين اليمنـتك
تمسح علينه
ــــــــــــــــــــــــــــــــــــــــــــــــــ ــــــــــــ
لينه نــدريبك تود .. نـــنتظر بلكت تـرد
صار عنــه سنــين غايب وين انته مبتعد
والله ملينه البعـــد .. الجَيتك احنه نستعد
لحظه لحظه الي تمرنه الشوفتك والله نعد
الحكم ظالم مستبد .. ايــريــدنه ما ننــسعد
شوكت تحظرنه يغالي وجرح شماتك تشــد
سهم الهجر ياسيدي أثر عليــنه
يا ما نطرنه الجيـتك يمته تجينه
تعلم زين بشيعتك ***** محتاجين اليمنـتك
تمسح علينه
ــــــــــــــــــــــــــــــــــــــــــــــــــ ــــــــــــ
يلــي من هاشم غصن .. ليــك كل لحظه نون
ما نــمـــل مــن انتــظــارك ابــد والله لاتــظن
ما يفارگنـــه الحـــزن .. بيـــنه اصبح مقــترن
الجسر من شاف الحنين البــينه ظل لجلك يحن
بسجنك الكل ممتحن .. شوكت يخلص هالسجن
بلكي ايامك البيـــض اعلينـــه يالوالـــي يجـــن
ايام سود ابفرگــتك عــشنه يغالي
نور الصبح ماشفنه ابد شفنه ليالي
متألمين الحالتك ***** محتاجين اليمنـتك
تمسح علينه
ــــــــــــــــــــــــــــــــــــــــــــــــــ ــــــــــــ
الوعد حلت ساعته .. المحب نزلت دمعته
ينتظر ساعة قدومــك صعبه صارت حالته
هالمصايب بـــچــته .. مــحن كــثره راوته
وجهك ايناطر يشوفه اشــوكت تكمل طلعته
شخصك الكل تانتـــه .. يمــتـــه بالله جيــته
احبابك بدربـــك نظــرهه يـبن جعفر فرشته
لو تدري انته بشيعتك شوگ الي بيهه
محتاجه لو بس ســيدي تنـــظر عليهه
مهتمين اوداعتك ***** محتاجين اليمنـتك
تمسح علينه
ــــــــــــــــــــــــــــــــــــــــــــــــــ ــــــــــــ
شيعـــتك متــجمعه .. عالجــسر متــوزعه
امــر هالعم الجموع اصواتهه بيه ترفــعه
خــبر عاجل تسمعه .. وابـــد ما تتــــوقعه
لـــن عساكر جثــه جابو شايليـــهه اربــعه
صاح صوت الفاجعه .. الجمع فجر مدمعه
الينتظر موسى ابن جعفر خل يجي وايشيعه
يعني چنت ياسيدي تدري بمماتك
وبسمه هارون النــذل يختم حـياتك
مجروحين الجتك ***** محتاجين اليمنـتك
تمسح علينه
ــــــــــــــــــــــــــــــــــــــــــــــــــ ــــــــــــ
هــل حزنه وابــتده .. بهالمصاب الي سـده
ياذنب انته اقـترفته وحاربــوك اهــل الرده
رحنه جسمك نگصده .. شفنـه اديك امگيده
بيهه أثار الحديد ويجــري مــنهه الــدم غده
السم دليلك بــدده .. وعــنه شخصك بـاعده
والتعــده بسمــه ليك اعلينــه يالغالي اعتـده
مصابك فجــعنه وننتظر چنه البشاره
ثاري الوعد فوگ الجسر هذا انتظاره
متأملين ازيارتك ***** محتاجين اليمنـتك
تمسح علينه
ــــــــــــــــــــــــــــــــــــــــــــــــــ ــــــــــــ
تمت والحمد لله في 7\6\2012
خادم اهل البيت حيدر تركي الكربلائي
ليست هناك تعليقات:
إرسال تعليق