لو غفت روحك وراحت يا علي
جم مصيبة البيها زينب تبتلي
انا زينب يا علي
ابقة انحب يا علي
_____________
ياعلي زينب خلافك تنهضم
والدهر بهمومه يسكمهه سكم
سورهه العالي بغيابك ينهدم
حالها ما يظل حالها الاولي
___________
عكب عينك ما تهيد وما تعين
فوك ونتها بعد زينب تون
تظل لاخر نفس بثياب الحزن
والدمع مسجوب والون معتلي
_______________
حيل ما ظل عدها من كسرالضلع
انوب راسك يا علي بي تنفجع
شجاب زينب عالبواجي وعالدمع
جانت امها تكلها يمة اتدللي
_______________
تسد وحشة امها يا حيدر جنت
تصبح بيا حال لو عنها رحت
نادت بلوعه صدك بوية متت
لا ابو ولا ام صفيت شظل الي
_____________
زينب الجانت وياك مدلله
خلافك تصير بهظم متعلله
كوم اخذها وياك يا عقد الوله
ترة خلافك بلوة زينب تبتلي
_____________
لون عدها حسين خليت وحسن
الهه ما يتركهم بحالة الزمن
كلهم يروحون عنهه وية المحن
يا علي وما يظل عدهم ولي
_______________
الك كالت ادري ابقه مودعه
عند كمر هاشم لجن والمشرعه
لون يمها جفوفة تبقه مكطعه
منهو اليباريني ويشد محملي
____________
رحت بوية وروحتك يم النبي
انا راح احسب لايام السبي
بعد بس الصبر اصبح مطلبي
ادري بهمومي بعد ما تنجلي
__________
تمت
للاستماع اضغط هنا
ليست هناك تعليقات:
إرسال تعليق