امي نذرتني هيه وصتني
يمة لا تنسى علي
_____________
جان الي والد يحبك يندبك يوم المحن
وامي غذتني الولاية من الطفوله وية اللبن
اكبر وهاي المحبة تكبر بكد الزمن
بذمتك امي امانه سيدي يابالحسن
تدعي وتصلي جانت تكلي
يمة لاتنسى علي
_______________
جانت تلوليلي بسمك لمن تهز بالمهد
تكلي لا تنسى علي واندب علي يوم الشدد
يمة حيدر ما تعوفة انطيني من هسة عهد
انا كتلها وحياتج ما اعوفه للابد
لازمة ايدي تكلي يوليدي
يمة لا تنسى علي
_______________
يا علي اشكر سعيها بتربيتها الطاهرة
تكلي اخدم بالمجالس يبني واخدم منبرة
يا علي انا بخدمتك صيح دنيا واخرة
يبني ولاخر حياتك هذا عهدي اتذكرة
اوفي تربيتي واسمع وصيتي
يمة لاتنسة علي
______________
كبل لتموت سألتها بالوصية تلفظي
تكلي يمة خلي عمرك بالخدامه ينقضي
والي حيدر وبسوة حيدر ابد لا ترتضي
من يسألونك تكلهم انا شيعي ورافضي
لا يهمونك لو يذبحونك
يمة لا تنسى علي
____________
تكول لا تترك طريقة يبني وامشي على الجمر
لا تعز عمرك ييمة وحيدر اغلى من العمر
الغالية الغذتني حبك يا علي من الصغر
وداعة الزهرة لامي احضر بالكبر
تكلي كل لحظة لو ردت ارضى
يمة لا تنسى علي
_______________
كلمن يحبك يحيدر يشكر الله ويحمده
انته ويا بالقيامة على الكوثر موعده
واجب على الشيعي كون يبوس ايده لوالده
لان ما قر بالولاية اله طاهر مولده
امي اشكرهه توصي اذكرهه
يمة لا تنسى علي
______________
انتهى
للاستماع اضغط هنا
ليست هناك تعليقات:
إرسال تعليق