اجيت لكربلا وايدي على ضلعي وشفت مهد الطفل ظل يجري دمعي
وانا ام الحسن غدر بية الزمن
اجيت شلون جية وتهمل الدمعة ويتعثر بمشية المنكسر ضلعه
وصلت المصرع ابني وشاهدت وضعه ضامي وجثته فوك الكاع متوزعه
على الغبرة السبط عاري ورمية حبيبي ومنذبح بالغاضرية
ومشة عنه الضعن غدر بيه الزمن
قميص ابني اخذته لوكفت المعبر وبجروح المصايب امشي واتعثر
يحمل جم جرح دلالي الموجر واشوف على الوطية موذر الاكبر
جرح ضلعي نزف شاهد جروحه وعسن روحي خلصت من قبل روحه
وانا بهاي المحن غدر بية الزمن
شفت جاسم وليدي منكطع نحره كعدت يمه وصحت انا امك الزهرة
يا عريس مثلك جسمه عالغبرة وشوباش العرس طبرة بأثر طبرة
عسن عيني العمه ولا ابني شفته على الغبرة الولد من دم رقبته
وجفوفة تخضبن غدر بية الزمن
واتجه على همي بدمعة مجرية وتعنيت لخيم وضلوعي محنية
وشفت مهد الطفل يبجي على راعيه واحن يم المهد والمهد حن ليه
انوحن والهظم كثر ونيني ومهد عبدالله واساني بجنيني
اون وليه ون غدر بية الزمن
رحت صوب الشريعة والجروح هواي واصرخ ويلي يبني الما شربت الماي
وطحت فوق الارض لن شاهدت عيناي يمنه على الارض وتصيح وين لواي
نشدت وينه كفيل ام المصايب وتكلي عالنهر عباسي غايب
وجفوفة تكطعن غدر بية الزمن
خذتهن للشفاعة فاطمة جفوفة وكمرهه على الشريعة نايم تشوفه
ومن ذاك العمود الهامة مخسوفة وحضنت جسم ابنهه بروح ملهوفة
تكله يا كمر زينب سبوهه الفواطم من بعد عينك ولوهه
وعسى عيوني انعمن غدر بية الزمن
ليست هناك تعليقات:
إرسال تعليق