وين الــ يغمض اعيوني ____حانت منيتـــــي
آنه امكم أوعفتوني ____ضل وحشه بيتـــــي
وترابي منهو يهيله ____ مرّولي بس الليله
حانت منيتـــــي
*▶●◀*▶●◀*▶●◀*▶●◀*
ابالي ظلّت هالصوّر والحزني گامت توحي
وظليت انوح أبديرتي محد يماثل نوحي
هالناس الي توصف جرح تضرب مثل بجروحي
مابين الافلاك أنعرف مشهوره بالون روحي
&&
دمع الحزن رافگني ____ ماجف عگبكم
وانه الهظم ظعظعني ____ چنت أنتظركم
جسمي تهدم حيله ____ مرّولي بس الليله
*▶●◀*▶●◀*▶●◀*▶●◀*
برض البقيع اورملته ترميني روج احزاني
أربع اگبور أبني بدي شما خط اسم بچاني
وابني گبر خامس بعد لبني ونبع شرياني
وانعه يبو اليمه ابحزن صبح ومسه خلاني
&&
ياربي وانته العالم ____ بحال انتظاري
وانخه تجيبه سالم ____ ليلي ونهاري
لجيته عگدت الشيله ____ مرّولي بس الليله
*▶●◀*▶●◀*▶●◀*▶●◀*
انتم يفرسان الوغه خيرة كواكب هاشم
يالماتخيبون الرجه شرّفتو ضرب الصارم
أرفعتوا راسي ابنصرته ابن الزچيه فاطم
چنت ارجه لي يبقه ذخر وادعيله دومه سالم
&&
كل ساعه اناطر بابي ____ عشت أبأماني
هسه يجوني احبابي ____ والهم دهاني
يارب تردلي العيله ____ مرّولي بس الليله
*▶●◀*▶●◀*▶●◀*▶●◀*
اعيوني تترجه ابأمل والهم حناهه أمتوني
كل لحظه اربه اعله الدرب ونشد مته توافوني
ردتك يبعد أمك تجي جيتك تسر اعيوني
وتجيب اخوتك كلها الي وبشدتي أتباروني
&&
مر الصبر باراني ____ طول الليالي
ماتنتهي أحزاني ____ عگب الغوالي
ماجف دمع من سيله ____ مرّولي بس الليله
*▶●◀*▶●◀*▶●◀*▶●◀*
گلبي اليوّن بچّه الصخر ماضل خليل العنده
بالعاده كلمن يحتضر اتحوطه اهله أولده
يبارونه ساعة شدته ما يحتضرهه وحده
يبصرهم ابعين الرضه يكتب وصيته اوعهده
&&
رافگني دمعي اوني ____ في ارض طيبه
خلّاني راحو عني ____ چني غريبه
وعشت ابهموم اثجيله ____ مرّولي بس الليله
*▶●◀*▶●◀*▶●◀*▶●◀*
اتمنه أضمّك بالگلب يبني بوسط سبّاحه
شما ضوّه مصباح الفجر وجهك الي مصباحه
ونته يبستان الامل ال وردتي الفواحه
لا راحه ضلت من رحت ومنين اجيب الراحه
&&
عگبك تغيب البسمه ____ يشهدلي ليلي
والفرح ضايع رسمه ____ يبني ابدليلي
چا نعشي منهو يشيله ____ مرّولي بس الليله
▶●◀*▶●◀*▶●◀*▶●◀**تمّت
قلم الخادم
الشاعر محمد ابورغيف
ليست هناك تعليقات:
إرسال تعليق