من أشوفك تبجي لوداعي تأذيني
لخاطري إمسح دمعتك يا نظر عيني
إصبر ولا تنفجع ... دمعك اغله من الضلع
.يا نظر عيني
_____________
انت العلمتني الصبر ياحيدر
ادري غاليه بوداعي تتاثر
امسح دمعتك عندي طلب اكبر
بچفك إمسح اعله الضلع المكسر
يالينسيني همومه ابسمة شفافه
باعتقادي لو مسحت ضلوعي تتشافه
اعليه لتظل منصدع دمعك اغله من الضلع
..................................................
تاج الراس اترجاك ترحمني
انكسارك هذا يا حيدر يألمني
انام وتعتني اتقبلني وتشمني
وتغطيني اعله كيف اتخاف تلچمني
وادري من توصي ولدك لا تگعدوها
ولا تلعبون اعله صدر امكم تلچموها
ياوتر مالك شفع دمعك اغله من الضلع
.......................................
الحسن ابنك ورث طبعك ويباريني
من اذكر موقفه ويايه يبچيني
زغير، ومن اجه الظالم سطر عيني
عله اطراف الاصابع وگف يحميني
من طحت طاح الحسن ياحيدر اعليه
حته بي ضرب السياط اتطيح موبيه
اخذ منك هالطبع دمعك اغله من الضلع
..............................................................
وابني حسين من يوم النظر وضعي
انظُر دمعه يتهامل گبل دمعي
اشوفه بكل صلا يتوجّه ويدعي
الهي شافي ضلع امي واخذ ضلعي
هالطفل من يمي يوصل ينسه كل همه
ايگلي من عمري اعله عمرچ يُمه يا يُمه
لا يهمك هالوضع دمعك اغله من الضلع
............................................................
وزينب ياعلي اتهيّج الي همومي
تمنت يومها يگرب گبل يومي
انام وادري شتسوي بوكت نومي
تروح لحجرتي واتقبّل اهدومي
ولوضوئي لو گمت انظرها ماترضه
تجيب ماي واني فوگ فراشي اتوضه
كافي لا تجري الدمع دمعك اغله من الضلع
.........................................................
لهذوله اطفالي ما اهتم لون يبچون
سبع فدوات الك يا بالحسن يرحون
علي انت علي دمعك يهل اشلون
وحقك عندي دمعك اغله من الكون
والله مو سهله عليه من اودعنك
اني كون ابچي لأن راح ارتحل عنك
والسماوات السبع دمعك اغله من الضلع
..
..
كرار حسين الكربلائي
ليست هناك تعليقات:
إرسال تعليق