رديت الك هاليوم -- خويه ياخويه
مظلومه يم مظلوم -- خويه ياخويه
انشد رقيه وين -- واسيني خويه حسين
--
خويه حن گلبي يريدك فرگتك صعبه عليّه
خويه والشام وجمرته تسعر الهل الساعه بيّه
انشد اويايه اجتي ابها الضعن بنتك رقيه
ابمجلس الظالم اخبرك خويه وافتها المنيه
انشدني هم تنظام -- خويه ياخويه
ضربوها هالظلام -- خويه ياخويه
مسودة ألمتنين -- واسيني خويه حسين
--
تدري من عفتك يخويه وآنه للشامت أسيره
ابلوعتي ابظيمي العليّه امصيبتي امصيبه چبيره
مارحم بينه عدوك ظالم وماعنده غيره
راسك ابرمحه يرفعه اعليّه كل ساعه يديره
لا رحم عدها الناس -- خويه ياخويه
ابكل رمح رفعوا راس -- خويه ياخويه
وآنه اصد بالعين -- واسيني خويه حسين
--
عالهزل رحنه يتامه واليتامه ابلايه والي
خويه مدري اعليهم أبچي خويه لو أبچي اعله حالي
آنه أخت عباس اگولن مانظر واحد خيالي
واصبحت بيد الشماته ابهظمتي وجور اليالي
لختك تصد اعيون -- خويه ياخويه
للكوفه امشي اشلون -- خويه ياخويه
او بحبال مچتوفين -- واسيني خويه حسين
--
تبچي يحسين اعله حالي لو شفت حال الغريبه
هاي اخت عباس گالوا تنسبي ولله عجيبه
وآنه متوشحه ابظيمي وأنچوي ابنار المصيبه
كل بدر عن عيني غايب طوّل اعليه مغيبه
راح اصفكت بالراح -- خويه ياخويه
ومنين اجيب الراح -- خويه ياخويه
عباس اجيبه امنين -- واسيني خويه حسين
----
آنه والهاظمني خويه من گمر هاشم فگدته
امدلل ه ايباريني هوه اعزيزه عنده زينب اخته
وأنهدم سور العليه ابلا چفوف ابعيني شفته
وراسه وياي اعله رمحه او جثه يم الشاطي عفته
يم الچفوف ابچيت -- خويه ياخويه
بيد القدر ظليت -- خويه ياخويه
واحظنت للچفين -- واسيني خويه حسين
--
خويه شبان الهواشم ياگبر غيّب بدرهم
ردنه ننصب هالمناحه والعزه الليله ابكترهم
وينه جسام الشباب او وينه الاكبر أرد اشمهم
وآنه عمتهم يخويه ارد اظل هالليله يمهم
عبد الله عفته اهناه -- خويه ياخويه
دليني وين الگاه -- خويه ياخويه
ابيا لحد صاير وين -- واسيني خويه حسين
00000000
سيد عدنان الحمامي
سيد عدنان الحمامي
ليست هناك تعليقات:
إرسال تعليق