كل دمعة بسجودك شفناهه بقيودك
يا موسى بن جعفر يا امامي
********
انختمت بالسجن صفحة حياتك على متون الجسر خلوا رفاتك
اجينة وشفنة دم باقي بعباتك لقينة دموعك التجري بصلاتك
وياك التقينة بالجمعه الحزينة
صوت الناعي كبر يا امامي
********
الك تمطر نجم عين الثريا نعشك يحمل اسرارة الخفية
غريبة يا غريب الكاظمية يسمونك امام الرافضية
يعايش وي نبضنة نعم الهم رفضنة
وحبك بينة يكبر يا امامي
********
دعاء الفرج تقراه ونسمعك بس الخالقك رخصته دمعك
حضرنة الليلة يالكاظم نشيعك نزل حتى العرش يبجي ويودعك
دمعات الوسافة يم جسر الرصافة
جمر الفركة يسعر يا امامي
********
ذكرني بعلي الكيد على زندك وبحال الحسن ذكرني جبدك
تشبه فاطمة السطرة على خدك مثل زينب تون بالغربة وحدك
آآه من الليالي فجعتكم يغالي
من محجر لمحجر يا امامي
********
على مصابك بجت عين البصيرة طبيبك شافك وبعيونه حيره
قام يصيح وينة العندة غيرة هالمسموم ما عنده عشيرة
اهل الغيرة حيهم تاخذ ثار ابنهم
عنك وينة حيدر يا امامي
********
رغم هاي المأسي وجور عصرك هذا انت اصبحت سلطان دهرك
راح اللارشيد وباقي ذكرك باب الحاجة للمعبود قبرك
واليقصد ضريحك تنطي من يصيحك
يوم الشدة تحضر يا امامي
********
للشاعر كرار حسين الكربلائي
ليست هناك تعليقات:
إرسال تعليق