عكبك منو اليرعانه_1434

يبو حسين مولانه -- عكبك منو اليرعانه

هالليله ايتامك تون 

يالمرتضى يابالحسن 

وايتامك الليله بمحن

كلها اصبحت حزنانه -- عكبك منو اليرعانه 

****************
لاوالي عدنا لااهل 

ايتامك احنا يالبطل

عكبك فكدناه الامل 

والعيون سهرانه -- عكبك منو اليرعانه

*************** 

متصوب بليلة قدر

والدينك افديت العمر

والكوفه عاشت عالغدر

كله طلعت خوانه -- عكبك منو اليرعانه 

******************* 
ظليت من بعدك اون

يابويه ليلي من يجن

من اذكر ايامك و احن

زينب انه حيرانه-- عكبك منو اليرعانه 

**************
من صغري يتمني الدهر

كضيت عمري بس قهر 

والروح ذبله السهر

وهالعيون عميانه -- عكبك منو اليرعانه 

غيبتك تصعب ياعلي

يالبيك كل هم ينجلي

ماغيرك العدنه ولي 

ياليتمه قرآنه -- عكبك منو اليرعانه

وينك يا حامي الحمه

يالبيك فوز وغانمه 

هالدنيه صارت مظلمه

يكرار عنوانه -- عكبك منو اليرعانه

**************

يبو حسين مولانه -- عكبك منو اليرعانه 

بقلم

عآشقة زينب عليها السلام 

كسري ما يجبره الا فضلك .. يا ابوفاضل_كرار الكربلائي1434

كسري ما يجبره الا فضلك .. يا ابوفاضل
گاصد لمضيفك وأسألك .. يا ابو فاضل
....
بنخوة ابن العرب مولاي انتخيتك
وانه ادري ما يرد خطار بيتك
( اليوم جايب زينب وياي واجيتك)
برجوة المكسور يالغالي ارتجيتك

انت تعلم بالخفايا ما أگلك .. يا ابوفاضل
گاصد لمضيفك وأسألك .. يا ابو فاضل
....
بكل عزيزه وغالي احلفك هالمسيه
بالحنينه الوالده وضلع الزچيه
( لا تردني سيدي بداعة رقيه)
كون ارد من عندك الحاجه بديه

يا حلم وبناظري احملك .. يا ابوفاضل
گاصد لمضيفك وأسألك .. يا ابو فاضل

...

سيدي تدريني دوم ابچي لمصابك
ويه زينب دمعتي تجري لخضابك
( علمتني ما أروح لغير بابك)
يا گمر وايجيب للمضطر جنابك
يا كريم وما تخجل الي گصدلك .. يا ابوفاضل
گاصد لمضيفك وأسألك .. يا ابو فاضل

____
للشاعر كرار الكربلائي

يالصادق يومك فاجعنه__كرارحسين الكربلائي1434

يالصادق يومك فاجعنه

نودعــــك يــــــالقرآن الناطق
انت السابق وانت اللاحق
نبجي اعله مصابك يالصادق
مـــا يكفي لفكدك مدمعنه

اسست بفــــــــكرك مذهبنــه
وحققنــــه بفضلك مطلبنه
هجرانــــك نـــــار تعــــذبـنه
وبهـــــاي النــــار اتلذعنه

ينعــــــاك الــــدين وقــرآنــه
الاحكـــــام لفكدك حزنانه
مر فراكـــــك يــــا مـــولانه
يلجـــــنت بعطفك جامعنه

اجـــــيال بــــعلمـــك تتـــعلم
صله الباري اعليك وسلم
واويـــــلاه اتجــــرعت السم
ريــت لذاك السم اجرعنه

بدلت الظــــــلمه بــــانوارك
شيـــــــدت الدين بأفكارك
منك موحش اصبــــح دارك
يــالصادق واحنه اتضيعنه

جمر السم ظل يخطف لونك
ولمــوتك غمضت اعيونك
والشيعه بنــوح يشيــــعونك
يــــاريت المــــوت يشيعنه

من حيدر يالمآخذ صبــرك
آهــــات وهم خلص عمرك
الله يلعن هـــــــادم كبـــرك
كبـــــرك مــــهدوم ولوعنه


خادم آل محمد (عليهم السلام)
كرارحسين الكربلائي

أحب آني مجالسكُم يشيعه _جابر النجفي

أحب آني مجالسكُم يشيعه == أنّــــــــه الصادق إبن أعظم وديعه
ــــــــــــــــــــــــــــــ
انَــــــــــه الصادق إبن حامي الحميّه == صرت شوكه إبعيون الناصبيه
صرت عنوان للشيعه إو هويه == ينادوهم بِسِم ياجعفريه
أسّست المدارس للشريعه == أنّــــــــه الصادق إبن أعظم وديعه
ــــــــ
أنَــــه المظلوم سمّوني النواصب == حقد بيهم عليّه إو غيض لاهب
يعرفوني عَلَم كُل المذاهب == يشيعه ما تذكروني إو أعاتب
مليت الدنيه بعلومي الوسيعه == أنّــــــــه الصادق إبن أعظم وديعه
ــــــــــ
عِلِم عندي أساس الكُل حضاره == صرت للدين أنوار إو مناره
كُل مذموم غيّرت إبمساره == هديته الخير وإبأجمل عباره
هديت الناس بفكاري البديعه == أنّــــــــه الصادق إبن أعظم وديعه
ـــــــ
أظل راية مجد منصوره بالكون == والرايد يطفّي النور مجنون
يِتِم النور باري الكون يدرون == والينكُر مجدنه إيصير ملعون
ما تشفع إلَه أمنَه الشفيعه == أنّــــــــه الصادق إبن أعظم وديعه
ــــــــــ
يزاير للبقيع إشتم تُرابي == ما عندي ضريح إتراب بابي
هدموه إبحقد واني إبمصابي == يظل للغايب المهدي عتابي
غيابه طال وتْنَطّر ربيعه == أنّــــــــه الصادق إبن أعظم وديعه
ـــــــ
يشيعي إحيي أمُرنه بالمآتم == كُل دمعه تُصب تجمعها
بالمحشر تنال الفوز غانم == جوازك من علي الكرار لازم
إلَك أضمن منازلنه الرفيعه == أنّــــــــه الصادق إبن أعظم وديعه
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـ
مع تحيات شاعر اهل البيت / جابر النجفي

واصادقــاه – واصادقــاه_جابر النجفي1433

ــــــــــــــــــــــــــــــــ
واصادقــاه – واصادقــاه === نُنادي قد مضى جعفرْ
واحسرتاه – واحسرتاه === جفانا الصادقُ الأطهرْ
ــــ
سد بابه العلم هاليـــــوم == لبس أسود على الصادق
كُل شيعي إبحزن مهموم == علــى إبن الهُدى الناطق
أبو موسى رمز معلوم == للشــــر ساحق إو ماحق
عِلِم عنده التقي موسوم == على الدنيــــه عَلَم خافق
واحسرتاه – واحسرتــاه === على دربِ الندى أسفرْ
واصادقــاه – واصادقــاه === نُنادي قد مضى جعفرْ
ـــــ
مآتمكم يشيعه إبنــوح == نصبوها على المسموم
على الصادق توّن الـروح == ﮔلب كُل شيعي بي ﻣﻟﭽــوم
ديوان العلم مجـــروح == وإطيور إبحزنها إتحوم
ألمنَه عالولي مَيْروح == ما ننســـاه جعفر دوم
واحسرتاه – واحسرتاه === بكــــى القرآنُ ياحيدرْ
واصادقــاه – واصادقــاه === نُنـادي قد مضى جعفرْ
ـــــ
فضل جعفر فلا ننساه == عميـــــد الجامعه الكُبْرَه
كتبت للبشر يمنـــــاه == علوم إتفيض بالبُشْرَه
فتح آفــــاق وإبعينـــــاه == رصد كُل ظاهره خطره
عالجها إبكبر تقواه == إبن الطاهره الزهره
واحسرتاه – واحسرتـاه === جرى دمعي دماً أحمرْ
واصادقــاه – واصادقــاه === نُنــادي قد مضى جعفرْ
ــــ
نعزّي المصطفه المختـــار == على الصادق نُجر حسرات
نعزّي المُرتضه الكرار == والمهـــدي أبو الخيرات
نصيح إبصوت يابو الثار == مــــــات الحق شبع موتات
رادوا تنطفي الأنـــوار == ما تُطفه أبد هيهات
واحسرتاه – واحسرتاه === تُــرابُ الطُهرِ قد كبّر
واصادقــاه – واصادقــاه === نُنــــادي قد مضى جعفرْ
ــــ
يارمز الحضاره إشلون == إيــد الشر تنال الخير
خيرك من إله الكون == ردت للأحســـــن التغيير
والناكر إلَك ملعون == نُكرانــه بلا تفسير
نواصب للهُدى إيكرهون == دربهــــــم منطق التكفير
واحسرتاه – واحسرتاه === فقــــــدنا رائداً أزهرْ
واصادقــاه – واصادقــاه === نُنادي قد مضى جعفرْ
ـــــ
ظنّوا تختفي الأنوار == بالتهديــــم يامـــــولاي
ما يدرون تُربك صار == كحل يشفي ألم عيناي
تجيك إو تعتني الـــزّوار == يَمَن تُربك يداوي الداي
يظل الناصبي بالعـــــار == لو شاف الكرامه هاي
واحسرتاه – واحسرتــاه === قلبي في اللظى يسعرْ
واصادقــاه – واصادقــاه === نُنادي قد مضى جعفرْ
ـــــــــــــــــــــــــــــ
مع تحيات شاعر اهل البيت / جابر النجفي

گــوموا نــِشــَيــْعـَه_جابر النجفي

هذا عميد المعرفه گــوموا نــِشــَيــْعـَه
جعفر ولينــــه === حــَگـــّه علينـــه
ــــــــــــــــــــــــــــــــــــــــــــــــــ ـــــــ
رمز الحضاره والعلم جعفر إمامــــي == أهواه إبن المـُصطفه حـُبـّي إو هيامي
ما أگدر إوصف سيدي يعجز كلامــــي == لأرض البقيع إبكــُل وكت أبعث سلامي
وأبعــث تحيــّه === لبـــن الزچيـــّه
هذا عميد المعرفه گــوموا نــِشــَيــْعـَه
ــــــ
نرفع تعازي الفاطمه الزهره الزچيـّه == وإنعزي حيــــدر والنبي سيد البريــّه
وإنعزي موسى الكاظم إبهاي الرزيـّه == وإنغيـــض أعداء الحضاره الناصبيــّه
ننصب عزانـه === يسمع ندانـــــه
هذا عميد المعرفه گــوموا نــِشــَيــْعـَه
ــــــ
فجعوا شفيعتنه إبإبنها الناصبه اليوم == سمّـــوه جعفر والهُدى يرثيه مهموم
طــُلاّبه يبچــون إبألم نادوا يمسموم == أحزان حـَلـّت بالعــِلـِم ما تنتهي دوم
مظلوم جعفــر === چبــــــده تــُوَذر
هذا عميد المعرفه گــوموا نــِشــَيــْعـَه
ــــــ
ياريت يـَمـّه إو بالبقيع إيصير مأتـــم == واليحضر إيزور الأمام إيفوز يــِغــْنــَم
ياخذ مـُراده إو حاجته إو هيهات يـِنــْدَم == وإبتــُربته إعطور الرساله الجاي يشتم
گصدوا تــُرابه === وإحيوا مـُصابه
هذا عميد المعرفه گــوموا نــِشــَيــْعـَه
ــ
وصــّانه جعفر للأبد نحيي أمرهـــــــــــم == ما نــِنــْســَه حگهم سادة الدنيه إبمجدهم
وإنظل نسير إبمنهج الصادق علمهم == ناخذ عزمنه من علي الكرار جدهم
نحييه يومــــه === نمشي إبعلومـــه
هذا عميد المعرفه گــوموا نــِشــَيــْعـَه
ــــــــ
سادس إمام إو بالعلم جعفرنه موســــوم == ينهل علومه إمن النبي مولانه معصوم
ودّع حياته إو بالألم گــَضــّاها مظلــوم == ظلموه أرباب الجهل كل طاغي مذموم
ما مات جعفر === ويـّانه يحضــــر
هذا عميد المعرفه گــوموا نــِشــَيــْعـَه
ـــــ

هاذي المدامع هامله مولانه تنعــــاك == علمك يشع بالمعرفه وإشلون أنساك
شيعي إمامي إو جعفري وأهواك أهواك == وإحزن يبو موسى على دمعات عيناك
وأهتف وأنادي === إبنــــــك يهادي
هذا عميد المعرفه گــوموا نــِشــَيــْعـَه
ــــــــــ
ما مات جعفر وإنتصر ما يختفي النور == رايـــــة هدايه للبشر ينشرها منصور
مولانه أبو موسى الشهم قرآن منشور == بيه الأمان ألكــُل محب ينخاه والسور
بالكون أزهـــر === مولانه جعفـــــر
هذا عميد المعرفه گــوموا نــِشــَيــْعـَه
ــــــــــــــــــــــــــــــــــــــــــــــــــ ــــــــــــــــــــــــــــــــــ
مع تحيات شاعر اهل البيت / جابر النجفي

واجعفراه == واجعفراه__جابر النجفي1433

ـــــــــــــــــــــــــــ
واجعفراه == واجعفراه == واجعفراه
واجعفراه == واجعفراه == واجعفراه
ــــــ
عزّوا يشيعه المرتضه والمصطفه هادينه
عزّوا الشفيعه فاطمه جعفر مُضه والينه
إيد النواصب وصلته بالهم ﮔضاها إسنينه
واجب علينه إنشيّعه يوم الحشر يحمينه
واجعفراه == واجعفراه == واجعفراه
واجعفراه == واجعفراه == واجعفراه
ــــــ
نصبوا المآتم والعزَه وإبكُل كتر ياشيعه
هذا العهد للمصطفه ثابت أبد مَنْبيعه
أمُر النبي إبحب عترته واجب علينه إنطيعه
منهج أهل بيت النبي لازم نوَضحه إنذيعه
واجعفراه == واجعفراه == واجعفراه
واجعفراه == واجعفراه == واجعفراه
ــــ
خطي إمامي إو جعفري حيدر علي عنواني
من جعفر الصادق خذت نهجي إو ثبت إيماني
وإلكُل ألم بيهم يُمر أعلنها دوم أحزاني
إنطاهم الله المنزله عدهم عِلِم ربّاني
واجعفراه == واجعفراه == واجعفراه
واجعفراه == واجعفراه == واجعفراه
ــــــ
كُل المدارس ﻓﮔدته حزنت لجل أحزانه
طُلاّبه بالهم والحزن ظلّوا بعد مولانه
ﻓﮔدوا عميد الجامعه والجامعه حيرانه
جعفر مضه عنهم مشه غاب الولي وإحسانه
واجعفراه == واجعفراه == واجعفراه
واجعفراه == واجعفراه == واجعفراه
ــــــ
ياريت أزوره إبتربته بأرض المدينه جعفر
بأرض البقيع إبكُل حزن أﺑﭽــي إو أون وأتحسّر
وأشتم تُرابه البي عطر وإبتربته أتعطّر
وأصرخ ونادي ياولي إشفعلي يابن حيدر
واجعفراه == واجعفراه == واجعفراه
واجعفراه == واجعفراه == واجعفراه
ــ
ﻋﺷﮔــي أبد ما ينتهي لهل النبي إو أولاده
الله جعلهم للبشر أهل الكرامه قاده
هذا أبو موسى الشهم ينطي مُحبّه إمراده
نوره يشع من تربته يستقبل الوفّاده
واجعفراه == واجعفراه == واجعفراه
واجعفراه == واجعفراه == واجعفراه
ـــ
ياريت أروح الكاظم إو أﺑﭽـــي إو اون يم بابه
وأهتف ونادي ياولي ودّع أبوك أحبابه
نرفع تعازينه إلَك يابو الرضا بمصابه
ودّع ولينه وإرتحل فارﮒ غصُب أصحابه
واجعفراه == واجعفراه == واجعفراه
واجعفراه == واجعفراه == واجعفراه
ــــــــــــــــــــــــــــــــــــــــــــــــــ ـــــــــــ
مع تحيات شاعر اهل البيت / جابر النجفي