جمــر المصاب الــي جـره إلكم إذيـعه ** أستمعو هاي الفاجعه الصارت يشيعه
من هشمو الصدر
ما ظـل بعـد صبر
إنـه الـوديــعه
ــــــــــــــــــــــــــــــــــــــــــــــــــ ـــ
قصتي ابديـهه . والكم ارويــهه. عالجره بحالي
دمعي مطلعهه . وحزني وزعهه . بعالم اهوالي
من رحل عني . والــدي اعنــي . انهدمت امالي
اللوعه شافتني . الدمعه عرفتني . ومــاهده بـالي
توهه المصايب ابـتدت وانه اعرفتهه ** واتـــألمـــت ياشيـــعتي لـمن شـفتهه
وبمبــتدى العـمر
ما ظـل بعـد صبر
إنـه الـوديــعه
ــــــــــــــــــــــــــــــــــــــــــــــــــ ـــ
العاده كل واحد . لو فگد والد . الناس اله اتصبره
تجتـمع يمـه . وتحـــتمل هــمه . اتســـاعده بأمـره
وانه منعوني . تهــمل عيوني . وصــرت متحيره
شلون جازوني . الصحبه أذوني . إوجــرو جمره
بنتـه الوحـــيده فاطـــمه وجــارو عليه ** وماچنه وصه المصطفى اصحابه بيه
واتنـــفــذ الأمـــر
ما ظـل بعـد صبر
إنـه الـوديــعه
ــــــــــــــــــــــــــــــــــــــــــــــــــ ـــ
روحي اواسيهه . بدمعي اسليهه . وناري تتوجـر
انــظر البابــي . اذكــر امصابي . دمعــي يتـفـجر
انخه ما اگــدر . للوصــي حــيدر . خاف يـــتأثـر
صحت يافضه . والصدر رضه . بدفعــته اتكــسر
ما اگـــدر انخــه ياعـــلي لمــن عــصرني ** ادري يــلبي دعوتـــي لو بـــس سمـــعنـي
بصدري اشتعل جمر
ما ظــل بعـــد صبــر
إنـه الـوديــعه
ــــــــــــــــــــــــــــــــــــــــــــــــــ ـــ
زادت اشجاني . هاجت احزاني . وروحي مهمومه
الغدر بســماره . بصدري شـب ناره . ومنه مالومه
مصـدر ألامــي . التــختم ايـــامي . اعليــه مرسومه
هـَشم اظلاعي . وغير اوضاعي . وصرت مهظومه
الالمني من الــي جـره وكـَـثر حنيـني ** لمن شفت فوگ الارض طايح جنيني
حسره عليــه إجر
ما ظـل بعـد صبر
إنـه الـوديــعه
ــــــــــــــــــــــــــــــــــــــــــــــــــ ـــ
گلبي شيجبره . موســهل كسره . أشد من ظلـعي
الينكسر گلـبه . حالتــه صــعبه . ايظل فقط ينعي
وجهي أثاره . واضــحه اخباره . البـيَــنه دمعــي
منظر السطره . وعيني هالحمره . غيرت وضعي
عن عيني يسأل حيدره شنو الي بيهه ** وكل ماسألني بيمنتي عـنه اغطــيهه
اعلـيه بقــه يـصر
ما ظـل بعـد صبر
إنـه الـوديــعه
ــــــــــــــــــــــــــــــــــــــــــــــــــ ـــ
ابمقتبل عمري . غيبو بدري . وحجبو انـواري
مارعو قدري . هشمو صدري . وداسو بـداري
بابي دفعوهه . اعليه شبــوهه . وماطفـت ناري
وتبقه مستعره . الزينب الــحره . هالهب سـاري
نـار الخــيام بكربلــه مصدرهه بــابي ** ومصاب ابو اليمه تره اصله مصابي
يازيـــنب اعتـــذر
ما ظـل بعـد صبر
إنـه الـوديــعه
ــــــــــــــــــــــــــــــــــــــــــــــــــ ـــ
تمت والحمد لله في 15\ 4\ 2012
خادم اهل البيت حيدر تركي الكربلائي
